नेपथ्यको १७ औं संगीतयात्रा क्यानाडामा

आगमनखबर संवाददाता

क्यानाडा । चर्चित सांगीतिक ब्याण्ड नेपथ्यले पहिलोपटक क्यानाडाको संगीतयात्रा गर्ने भएको छ। १ अक्टोबर आइतबार नेपथ्यले आफुलाई क्यालगरी सहरको ‘दी प्यालेस थिएटर’ मा ४ अक्टोबर बुधबार भ्यानकुभर सहरको ‘दी भोग थिएटर’ मा र ८ अक्टोबर आइतबारका दिन ब्याण्ड टोरन्टोस्थित ‘म्यासी हल’मा प्रस्तुत हुने भएको छ ।

नेपथ्यले हालसम्म १६ वटा देशको २८ सहरमा ७८ वटा कार्यक्रम गरिसकेपछी क्यानाडामा नेपथ्यको १७ औं संगीतयात्रा नेपथ्य कन्सर्टको तालिका घोषणा भएको हो ।

केहि समययता नेपालीहरुका निम्ति क्यानाडा आप्रवासनको आकर्षक गन्तब्य बन्दै आएको छ। त्यसमा पनि विशेषगरि अध्ययनका लागि नेपाली विद्यार्थीहरुको संख्या बर्षेनी बढ्दो छ। बढ्दो जनसंख्यासंगै यहाँका नेपाली संघसंस्थाहरुले आयोजना गर्ने विभिन्न खाले सांगीतिक कार्यक्रमहरुको संख्या पनि नियमित बन्दै गएको छ।

सन २०२३ भरि नेपथ्यका सबै प्रस्तुतीहरुलाई ‘मानवताका लागि संगीत’ को नारा सहित मानवता प्रबर्धन अभियानको श्रृंखलाको रुपमा प्रस्तुत गर्ने विचार अनुरुप यसपालीको नेपथ्य क्यानाडा शृंखला पनि त्यही नारा अन्तर्गत गरिएको नेपथ्यले जनाएको छ ।

नेपथ्यको प्रस्तुतीमा एकरुपता ल्याउनका लागि नेपालमा र विदेशमा नेपथ्यसँग अनुभव बटुलेका प्राबिधिकहरुलाई यात्रा टोलीमा सम्मिलित गर्दै आएको छ। सोहि अनुरुप, अघिल्लो महिनाको श्रृंखलावद्ध जापान यात्रामा सम्मिलित ८ जना प्राविधिज्ञ एवं व्यवस्थापक र ६ संगीतकर्मी सहित जम्मा १४ जनाको टोली क्यानाडा यात्रामा समावेस हुनेछन्।

नेपथ्य कन्सर्टका निम्ति स्थानीय समय अनुसार बेलुकीको पाँच बजे प्रवेश खुला गरिनेछ भने ठीक सात बजे कन्सर्ट सुरु हुनेछ। अनलाइनबाट टिकटको बिक्रि व्यवस्थापन भैरहेको यात्राका सबै कन्सर्टहरुमा विद्यार्थी समुहको निम्ति विशेष छुटको ब्यवस्था पनि गरिएको आयोजकले जनाएको छ।