कोशी प्रदेशको नाम खारेजी माग गर्दै राजधानीमा प्रदर्शन

आगमनखबर संवाददाता

काठमाडौँ। शुक्रबार सचेत पहिचानवादी संघर्ष समिति, किरात याक्थुङ चुम्लुङ काठमाडौं लगायत पहिचानवादी संस्थाहरुले काठमाडौंको माइतीघर मण्डलामा कोशी प्रदेशको नाम खारेजी माग गर्दै प्रदर्शन गरेका छन् ।

विभिन्न संगठनका अगुवाहरूले माइतीघरदेखि नयाँ वानेश्वरको संसद्‍ भवनसम्म मार्चपास गरेका हुन् । कोशी प्रदेशको नाम खारेज गर्न माग गर्दै विरोध प्रदर्शन भएको हो ।

प्रदर्शनमा नागरिक समाजका अगुवाहरूको पनि बाक्लो उपस्थिति छ । प्रदर्शनमा सहभागीमध्ये एक राजन मुकारुङले कुनै पनि आवाजलाई वार्ताद्वारा सम्बोधन गर्नु असल संस्कृति भएकाले चाँडो भन्दा चाँडो समस्या समाधानतर्फ जानु उचित हुने बताए ।

नागरिकको समस्या समाधान गर्न नसके प्रदेश सरकार र केन्द्र सरकारको नेतृत्वले राजीनामा दिनुपर्ने उनले बताए । यस्तै प्रदेश नामकंन विरोधको प्रदर्शनका क्रममा मृत्यु भएका लाजेहाङ लिम्बूलाई सहिद घोषणा गर्न पनि प्रदर्शनकारीहरूले माग गरेका छन् ।

• Categories
• #मुख्य समाचार
• #राजनीति
• #सम -सामयिक