सबै सांसदलाई मन्त्री चाहिएकाले प्रचन्ड तनाबमा

आगमनखबर संवाददाता

काठमाडौँ — माओवादी केन्द्रका अध्यक्ष पुष्पकमल दाहालले मन्त्रीका आकांक्षी धेरै भएर हैरान भएकाे बताएका छन् । प्रधानमन्त्री शेरबहादुर देउवाले विश्वासको मत प्राप्त गरेपछि मन्त्रिपरिषद् विस्तार गर्ने काम हुन् सकिरहेको छैन। गठबन्धन दलका अध्यक्ष दाहालले आफ्नो पार्टीका सबै सांसदले मन्त्री बनाउन भन्दै दबाब दिइरहेको बताएका हुन् ।

पार्टी कार्यालय पेरिस डाँडामा शनिबार आयोजित नेकपाका संस्थापक नरबहादुर कर्माचार्यको ८ औं स्मृति दिवसका अवसरमा दाहालले भने, ‘मन्त्री बन्न दबाब दिने मान्छेको हुलभित्रबाट आएको छु। आतंक छ मेरो दिमागमा, कसलाई मन्त्री बनाउने कसलाई नबनाउने ?’ पार्टीका सबै सांसदलाई मन्त्री चाहियो उनले बताए । ‘हाम्रा सांसद सबैलाई मन्त्री चाहिएको छ । हामीले पाउने बढीमा ७ जना हो,’ उनले भने, ‘यहाँ मन्त्री नभए भने नेतृत्वलाई सरापेर हिँड्ने, पायो भने मात्रै गर्ने प्रवृत्ति छ । ठूलै नियुक्ति पायो भने ठीक छ, पाएन भने नेतृत्व बेइमान भन्ने प्रवृत्ति छ ।’

दुईजना मन्त्री बनाइसकेको माओवादीसँग प्रतिनिधिसभामा सभामुखसहित ४९ सांसद छन् । त्यस्तै, राष्ट्रिय सभामा रहेका सांसद पनि मन्त्री बन्ने दौडमा रहेका छन् ।

• Categories
• #राजनीति
• #सत्ता समीकरणको खेल
• #सम -सामयिक