क्यानडा मौसम: उखरमाउलो गर्मी, ज्यान गुमाउनेको सङ्ख्या ६० नाघ्यो

आगमनखबर संवाददाता

क्यानाडा। क्यानडाको दक्षिणी प्यासिफिक नर्थवेष्ट क्षेत्रभरि तापक्रम बढिरहँदा कैयौँ मानिसहरूको मृत्यु भएको छ। सोमवार ब्रिटिश कोलम्बियामा ज्यान गुमाउनेको सङ्ख्या ६० नाघेको प्रहरीले जनाएको छ र त्यसमा ज्येष्ठ नागरिकहरू धेरै छन्।

ब्रिटिश कोलम्बियास्थित लीटनमा आइतवार ४६.६ डिग्री सेल्सियस तापक्रम थियो भने सोमवार बढेर ४७.९ डिग्री सेल्सियस पुगेको थियो।

यो साता अघि क्यानडामा कहिल्यै पनि ४५ डिग्री सेल्सियसभन्दा बढी तापक्रम पुगेको थिएन।

रोयल क्यानडियन माउन्टेड प्रहरी माइक कलान्जले भ्यानकुभरको बाहिरीबस्ती रहेको बर्नेबीमा रहेका आफ्ना छिमेकी परिवारका सदस्य, ज्येष्ठ नागरिकको के अबस्था भइरहेको छ, बुज्न आग्रह गरेका छन।

यो मौसम हाम्रो समुदायका जोखिममा रहेका सदस्यहरूलाई घातक हुनसक्ने हामीले देखिरहेका छौँ, खासगरी ज्येष्ठ नागरिक र पहिला नै स्वास्थ्य समस्या भएकाहरू बढी जोखिममा छन्। यस्तो अति गर्मीका बेला हामीले एकअर्काबारे बुझ्नु अति आवश्यक छ कलान्जले भने ।

ग्लोब र मेल पत्रिकाले जनाए अनुसार ब्रिटिश कोलम्बियाका प्यारामेडिकहरूले तापक्रम बढ्दा समस्या भएको भन्दै एकसयभन्दा बढी मानिसले फोन गरेर मद्दत मागेका थिए।

लीटनको सानो गाउँमा बस्ने मेघन फ्यान्डरिचले ती पत्रिकालाई जनाए अनुसार घरबाट बाहिर निस्किन “लगभग असम्भव” थियो। “सहनै नसक्ने भएको छ,” उनले भनिन्।

इन्भाइरोन्मेन्ट क्यानडाले बढ्दो तापक्रमबारे ब्रिटिश कोलम्बिया र अल्बेर्टालाई चेतावनीसहितको सूचना जारी गरेको छ। त्यसबाहेकका उत्तरपश्चिमी भूभागलाई पनि सूचना जारी गरिएको छ।