देशकै सर्वोत्कृष्ट नगर वालिङ नगरपालिकामा सुख्खायाममा धुलो र वर्षायाममा हिलो सडक प्रमुख चुनौती

आगमनखबर संवाददाता

स्याङ्जा । देशकै सर्वोत्कृष्ट नगर घोषित भएको वालिङ नगरपालिका मुलुककै पहिलो स्मार्ट सिटि र पिन्क सिटि शहर भनिन्छ । सर्वोत्कृष्ट नगर, पिन्क सिटिले परिचित वालिङ नगरपालिकाका सर्वसाधारण कष्टकर र जोखिमपूर्ण यात्रा आवतजावत गर्न बाध्ध छन् ।

शहरी योजना, वातावरण, विपद जोखिम ब्यवस्थापन र उत्थानशिलतामा देशकै सर्वोत्कृष्ट नगर घोषित वालिङ नगरपालिकामा विकास कार्य कछुवा गतिमा हुँदा अहिले यो शहर अस्तव्यस्त बनेको छ । सुख्खायाममा धुलो र वर्षायाममा हिलो देखिने यहाँका सडक प्रमुख चुनौती हुन् । यसको समाधान हुन नसक्दा यो शहरलाई कुरुप पारेको छ । नगर प्रवेश गर्ने सबै सडक मात्र होइन भित्री सडक समेत जिर्ण हुँदा सर्वसाधारण कष्टकर र जोखिमपूर्ण आवतजावत गर्न बाधय भएका हुन ।

सडकमा परेका खाल्डाखुल्डीले तथा सडक हुँदै बग्ने पानीले साना ठूला सवारीसाधान मात्र होइन पैदल आवतजावतमा समेत सकस हुने गरेको छ ।

नगर प्रवेश गर्ने धौखोला-त्रियासी सडक जगत-मिर्दी सडकखण्ड हाल बेहाल छ । नगरका मुख्य सडकहरुको अवस्था पनि उस्तै छन् । सडकमा रहेका ठूलाठूला खाल्डामा पानी जमेका कारण सवारीसाधन हतपत जान मान्दैनन् भने पैदल आवतजावत गर्दा हातमा चप्पल जुत्ता बोक्नु पर्ने अवस्था छ ।

बजार क्षेत्रकै सडकमा पनि दर्जनौं खाल्डा छन् । वर्षाले त समस्या झनै थपिएको छ । एकातिर सडकमा जताततै खाल्डाखुल्डी अर्कोतिर जमेको पानी निकासको व्यवस्था नहुँदा आवागमनमा निकै समस्या भएको स्थानिय बताउछन ।

नाला निर्माण भइरहेका ठाउँमा पनि पानीको निकास नहुँदा नगरवासी समस्यामा परेका छन् । पहिले नालातिर भेल हुन्थ्यो, अहिले सडकमै भेल छ, यस्तो स्थिती हुनु दुर्भाग्य हो ।जथाभावी फ्यालिएको फोहर अहिले सडकमा जमेको पानीमा मिसिएर फैलिदा रोग फैलिन सम्भावना समेत बढेको छ ।

ग्रामिण भेगका सडकको त झन बिजोक छ । जतागयो उतै हिलो नै हिलो रहेको स्थानियको भनाई छ । सडक दुरावस्थाबारे जनप्रतिनिधि, सडक विभाग र ठेकेदार सबै जानकार छन् । तर, कसैले पनि गम्भिरता नदेखाएको भन्दै स्थानियले अविलम्ब जिर्ण सडकको मरमत र पानी निकासको उचित व्यवस्था मिलाउन माग गरेका छन् ।