बढी शुल्क लिने मेडिकल कलेजलाई कारबाही गर्ने शिक्षामन्त्रीको चेतावनी

आगमनखबर संवाददाता

काठमाडौँ ।शिक्षा, विज्ञान तथा प्रविधिमन्त्री देवेन्द्र पौडेलले विद्यार्थीबाट तोकिएको भन्दा बढी शुल्क लिने मेडिकल कलेजलाई कारबाही गर्ने चेतावनी दिएका छन् ।

अतिरिक्त शुल्क फिर्ता गरेर विवाद समाधान गर्न उनले काठमाडौं मेडिकल कलेजलाई शुक्रबारसम्मको अल्टिमेटमसमेत दिएका छन् । उनी कलेज अनुगमनका लागि बिहीबार भक्तपुरको दुवाकोट पुगेका थिए ।

भक्तपुरका प्रमुख जिल्ला अधिकारी रुद्रादेवी शर्मा र कलेजका प्रिन्सिपल रवीन्द्रनाथ श्रेष्ठलाई निर्देशन दिएको मन्त्री पौडेलको सचिवालयले जनाएको छ । मन्त्री पौडेलसँगै प्रजिअ शर्मा पनि कलेज अनुगमनमा गएकी थिइन् ।

एमबीबीएस प्रथम वर्षमा भर्ना भएका विद्यार्थीसँग कलेजले तोकेभन्दा बढी शुल्क मागेको भन्दै विद्यार्थी एक महिनादेखि आन्दोलनमा छन् । विद्यार्थी, अभिभावकले भक्तपुर र काठमाडौं जिल्ला प्रशासनमा समेत उजुरी दिएका छन् । मन्त्री पौडेलले प्रशासनको रोहबरमा विद्यार्थीसँग वार्तामा बस्न प्रिन्सिपल श्रेष्ठलाई निर्देशन दिएका थिए ।

त्यसपछि प्रजिअ शर्माले शुक्रबार १० बजेका लागि बैठक डोकेकी छन् । ‘चिकित्सा शिक्षा ऐनले तोकेभन्दा बढी शुल्क लिएको भए कारबाही हुन्छ,’ मन्त्री पौडेलले श्रेष्ठलाई भनेका थिए, ‘बढी शुल्क नलिएको पुष्टि विद्यार्थी र सीडीओसँग बसेर गर्नुहोस्, होइन भने गृहमन्त्रीसँग पनि मेरो कुरा भएको छ, कारबाही हुन्छ ।’

कलेजका प्रिन्सिपल श्रेष्ठले भने चिकित्सा शिक्षा आयोगका कारण शुल्क विवाद भएको आरोप लगाए । जवाफमा मन्त्री पौडेलले बढी शुल्क नलिएको कुरा वार्ताबाट प्रमाणित नगरे कानुनअनुसार कारबाही गर्ने बताएका हुन् । शुल्क र वार्ताबारेको निष्कर्ष शुक्रबारभित्रै शिक्षा मन्त्रालयमा बुझाउन पनि उनले अल्टिमेटम दिएका छन् । कलेजले अतिरिक्त शुल्क लिएको विरोधमा विद्यार्थीले तालाबन्दी र प्रदर्शन गर्दै आइरहेका छन् ।

बुधबार शिक्षा मन्त्रालयले विज्ञप्ति जारी गरेर विद्यार्थीसँग बढी शुल्क असुल गर्ने कलेजलाई कानुनी कारबाही गरी सम्बन्धन खारेज गर्ने चेतावनी दिएको थियो । नोबेल मेडिकल कलेज विराटनगर र काठमाडौं मेडिकल कलेजमा शुल्क विवाद कायमै छ । यी दुवै कलेजका सञ्चालक सुनील शर्मा हुन् । उनी कांग्रेसका महाधिवेशन प्रतिनिधि भएका कारण पनि सत्तारूढ दलको संरक्षणमा कारबाही प्रक्रिया अघि बढ्न नसकेको विद्यार्थी–अभिभावक गुनासो गर्छन् ।

गृह मन्त्रालयले समेत अतिरिक्त शुल्क लिने कलेजलाई कानुनी कारबाही गर्न प्रजिअहरूलाई निर्देशन दिइसकेको छ । आयोग र शिक्षा मन्त्रालयले पनि बढी शुल्क लिए सम्बन्धन खारेजीको प्रक्रिया अघि बढाउने चेतावनी दिएका छन् । शुल्क विवाद देखिएको पोखराको मणिपाल मेडिकल कलेजले भने बढी शुल्क नलिने प्रतिबद्धता जनाएको छ ।कान्तिपुर दैनिकमा खबर छ ।