कञ्चनपुरमा सरकारविरुद्ध बयलगाडामा गोरु र रागा नारेर प्रदर्शन

आगमनखबर संवाददाता

कञ्चनपुर । बेलडाँडी गाउँ कार्यसमितिले सरकारविरुद्ध चौवन्नी बजारमा प्रतिनिधिसभा विघटनको असंवैधानिक कदमविरुद्ध प्रदर्शन गरेको छ । चौवन्नी बजारमा गरिएको प्रदर्शनको दृष्य भने अन्य स्थानको भन्दा केही फरक थियो ।

बेलडाँडी गाउँ कार्यसमितिको आयोजनामा भएको विरोध प्रदर्शनमा कांग्रेसका नेता–कार्यकर्ताहरु बयलगाडासहित र्‍यालीमा उपस्थित भएका थिए । सामान्यतया बयलगाडामा जोडी गोरु वा जोडी रागा नारिएका हुन्छन् ।

तर, बेलडाँडीका कांग्रेस नेता–कार्यकर्ताहरु भने एक गोरु र एक रागा नारेर बयलगाडासहित प्रदर्शनमा उत्रिएका थिए । गोरु र रागा नारेर प्रदर्शनमा ल्याइएको बयलगाडा हाँकी रहेका थिए, सचिन कठायत ।

उनी नेपाल तरुण दलका बेलडाँडी गाउँकमिटी सचिव हुन् । सचिव कठायतले गोरु र रागा नारेर बयलगाडासहित प्रदर्शनमा उत्रिनुको कारण खुलाउँदै भने, “जसरी एउटै गाडामा गोरु र रागा नारिदैन, त्यसलाई अस्वाभाविक मानिन्छ नि हो त्यसैगरि एमाले र माओवादीबीचको पार्टी एकता पनि अप्राकृतिक थियो । हामीले गोरु र रागा नारेर तत्कालीन एमाले र माओवादीबीचको गठबन्धनलाई चित्रित गर्न खोजेका हौं ।”

• Categories
• #राजनीति