खुडोल फाँटमा धान रोपेरै छाडे खोकनावासीले

आगमनखबर संवाददाता

खुडोल फाँटमा शनिबार खोकनावासीले सांकेतिक विरोध गरेका छन् । उनीहरुले धान रोपेर र भटमासको बिउ छर्दै सांकेतिक रुपमा विरोध जनाएका हुन् ।यसअघि खुडोल फाँटमा धान रोप्‍न जाँदा प्रहरी र स्थानीयबीच झडप हुँदै आएको थियो । खुडोल क्षेत्रमा शनिबार प्रहरीको उपस्थिती नभएपछि खोकनावासीले धान रोपेका हुन् ।

खुडोल फाँट काठमाडौं–तराई जोड्ने द्रुतमार्ग (फास्ट ट्रयाक) को ‘जिरो किलोमिटर’हो । सो क्षेत्रको जग्गा सरकारले अधिग्रहण गरेको छ । तर, स्थानीयले भने मुआब्जा लिइसकेका छैनन् । उनीहरुले सरोकारवालासँग छलफल नै नगरि एकलौटी ढंगबाट तयार गरेको मुआब्जा स्वीकार नभएको, फास्ट ट्रयाकसँगै वाग्मती करिडोर, १ सय ३३ केभी प्रसारण लाइन, बाहिरी चक्रपथको विन्दु पनि खोकना फाँटमै पर्ने भएकाले मौलिक बस्तीको अस्तित्व सखाप हुने भन्दै विरोध जनाउँदै आएका छन्।

खोकनबासीले सेनाको प्याराग्लाइडिङ चौर, भैंसेपाटी आवास, रेडियो नेपालको टावर राख्‍न गरेर पटक पटक सरकारलाई जग्गा दिइसकेको छ । अहिले स्मार्ट सिटी जस्ता जतिपनि अन्य योजना छन् । यसले आदिवासी विस्थापित मात्र नभई मौलिक बस्तीको अस्तित्व नै सखाप पार्ने निश्चित छ स्थानीयले भने ।

स्थानीयले संसदको विकास समितिले बुङमती र खोकनाबासीको माग तत्काल सम्बोधन गर्न सरकालाई दिएको निर्देशन पनि वेवास्ता गर्दै आइरहेको आरोप लगाए । स्थानीय तहमा जनप्रतिधि आएलगतै ललितपुर महानगरका मेयर र उमेयरले स्थानीयको मागको सम्बोधन गर्न पहल गर्ने बताएका थिए । तर, अहिले स्थानीय जनप्रतिनिधि पनि मौन छन् ।

ललितपुरका तत्कालीन प्रजिअ यादवप्रसाद कोइरालाको अध्यक्षतामा बसेको मुआब्जा निर्धारण समितिको बैठकले पाखो बारीअन्तर्गत पर्ने भैंसेपाटीमा मोटर बाटो जग्गाको प्रतिरोपनी ४७ लाख ५० हजार, गोरेटोको ४० लाख ५० हजार, बाटो नभएको २६ लाख, खोकनामा मोटर बाटो जग्गाको ४४ लाख, गोरेटोको ३६ लाख, बाटो नभएकोमा २५ लाख, बुङमतीमा मोटर बाटोको ४१ लाख, गोरेटो ३३ लाख, बाटो नभएको २४ लाख र डुकुछापमा मोटर बाटो ३८ लाख, गोरेटो ३० लाख, बाटो नभएको २३ लाख छुट्याएको थियो ।

• Categories
• #सम -सामयिक