शिवरात्रिका अवसरमा पशुपतिमा यस्तो छ ट्राफिक व्यवस्थापन

आगमनखबर संवाददाता

काठमाण्डाै। महानगरीय ट्राफिक प्रहरी महाशाखाले शिवरात्रिका अवसरमा पशुपतिमा आवश्यक ट्राफिक व्यवस्थापन गरेको जनाएको छ ।

ट्राफिक प्रहरीले पशुपतिनाथको मन्दिर दर्शन गर्न आउने दर्शनार्थीबाहेक चाबहिल, गौशाला, तिलगङ्गा हुँदै अन्यत्र जाने गाडीलाई वैकल्पिक बाटोको प्रयोग गर्न अनुरोध गरेको छ । पशुपति क्षेत्रमा आउने/जाने भक्तजन एवम् दर्शनार्थीको भिडलाई व्यवस्थापन गर्न आवतजावत तथा पार्किङको व्यवस्थान मिलाइएको छ ।

सिफल चौर, गौरीघाट करिडोर, गुह्येश्वरी, तिलगङ्गाको पार्किङ्ग र तिलगङ्गा करिडोरमा पार्किङको व्यवस्था मिलाएको छ । यसैगरी पशुपति क्षेत्र विकास कोषको कार्यालय भित्र कोष तथा पासवाहक गाडी, गौशाला प्रहरी कार्यालय भित्र सुरक्षा निकाय तथा पासवाहक सरकारी गाडी र वनकाली क्षेत्रमा अन्य अत्यावश्यक प्रयोजनका गाडी पार्किङ गर्ने व्यवस्था मिलाइएको महाशाखाले जनाएको छ ।

ट्राफिक महाशाखाका प्रवक्ता प्रहरी उपरीक्षक सञ्जिव शर्मा दासले चाबहिलबाट गौशालातर्फ, पुरानो बानेश्वरबाट गौशालातर्फ, ज्ञानेश्वर मैतिदेवीबाट रातोपुल हुँदै गौशालातर्फ, सिफल चौरबाट जय बागेश्वरी तर्फको रुटमा चल्ने गाडीलाई वैकल्पिक मार्ग भइ सञ्चालनको व्यवस्था मिलाइएको जानकारी दिनुभयो । त्यस्तै तीनकुनेबाट सिनामङ्गल तिलगङ्गातर्फ, चाबहिलबाट गौशालातर्फ र वाग्मती करिडोरबाट गौरिघाट र तिलगङ्गा क्षेत्र भइ चल्ने मालवाहक गाडीलाई निषेध गरी डाइभर्सन गरिएको छ ।

गौशाला क्षेत्र आसपासमा छुट्टाछुट्टै ठाउँमा पार्किङ स्थल तोकिएको ट्राफिक प्रहरी महाशाखाले जनाएको छ । चाबहिल, गौशाला, तिलगङ्गा क्षेत्रमा भिड बढेमा यी रुटमा भक्तजन बाहेकका गाडीलाई वैकल्पिक मार्गबाट सञ्चालनको व्यवस्था मिलाइने महाशाखाका प्रमुख एसएसपी उमेशराज जोशीले बताउनुभयो । गौशाला क्षेत्र हुँदै चक्रपथमा चल्ने गाडीलाई मित्रपार्क–गौशाला–तिलगङ्गा क्षेत्रमा प्रवेश निषेध गरी वैकल्पिक व्यवस्था मिलाइनेछ।

• Categories
• #मुख्य समाचार
• #सम -सामयिक