बाढीको असर -तरकारीको मूल्यवृद्धि हुने सम्भावना

आगमनखबर संवाददाता

अविरल वर्षापछि आएको बाढी तथा पहिरोको असर काठमाडौंमा तरकारीको मूल्यवृद्धि हुने सम्भावना देखिन थालेको छ ।

बाढी पहिरोले सडक अवरुद्ध हुँदा काठमाडौं उपत्यकामा तरकारीको अभाव देखिने भएको हो । 

काठमाडौंमा तरकारी पहिलेको तुलनामा केही दिनदेखि कम भित्रिएको कालीमाटी फलफूल तथा तरकारी बजार विकास समितिले जनाएको छ ।  

बाढी तथा पहिरोका कारण सोमवार मात्रै काठमाडौं भित्रने मुख्य सडक पृथ्वी राजमार्गका विभिन्न सडक क्षतविक्षत भएको छ । जसकारण तरकारी तथा फलफूलको ढुवानीमा समस्या भएको कालीमाटी फलफूल तथा तरकारी बजार विकास समितिका सूचना अधिकारी विनय श्रेष्ठले बताए । उनले भने,‘केही दिनको तुलनामा अहिले तरकारीको आयात घटेको छ ।

उनका अनुसार सामान अवस्थामा मुलुकका  विभिन्न भूभागबाट दैनिक करिब ६ सय टन तरकारी बजारमा भित्रन्थ्यो । तर सडक अवरुद्ध भएका कारण साउन ३ गते ४७४ टन, साउन ४ गते ४९० टन र साउन ५ गते ३२७ टन मात्र तरकारी बजारमा आइपुगेको छ ।उनले साउन ६ गते मंगलबार मध्यान्हसम्म एक सय ५० टन मात्रै तरकारी आइपुगेको जानकारी दिए । 

बजारमा आयात कम भएपछि मूल्य बढ्ने अनुमान गरिएको छ । पहिले भारतबाट पनि तरकारी आयात गरेर बजार माग धानिन्थ्यो । तर अहिले सडक अवरुद्ध छ । जसकारण बजारमा माग बमोजिम तरकारी पुर्‍याउन गाह्रो हुने र यसले मूल्य वृद्धि निम्त्याउने सरोकारवालाहरु बताउँछन् । अहिले धादिङ मकवानपुर लगायतका सिमित जिल्लाहरूबाट मात्र तरकारी आयात भइरहेको छ ।

• Categories
• #अर्थतन्त्र
• #सम -सामयिक