यातायात सन्चालन नहुदा ब्यबसायी र बैंक दुवै समस्यामा

आगमनखबर संवाददाता

पृथ्वी राजमार्ग बस सञ्चालक कम्पनी (प्रा.लि) ले बैंक तथा वित्तीय संस्थाहरूमा किस्ता तिर्ने अवधि थप ६ महिना बढाइदिन सरकारसँग आग्रह गरेको छ । लामो समय सवारीसाधन थन्किएकाले अहिले नै किस्ता तिर्ने अवस्था नरहेकोले थप ६ महिना समयावधि बढाइदिन कम्पनीले आग्रह गरेकाे हाे ।

कम्पनीका अध्यक्ष योगेन्द्र केसीले कम्पनीका १४ सय सवारीसाधनमा पाँच अर्ब ६० करोडको लगानी रहेको जानकारी दिए । त्यसमध्ये ७० प्रतिशत लगानी बैंक, वित्तीय संस्थाहरूको रहेको उनको भनाइ छ । उनले सवारीसाधनमा भएको लगानी डुबे बैंक तथा वित्तीय संस्था पनि डुब्नेतर्फ ध्यान दिन सरकारलाई आग्रह गरे ।

किस्ता तिर्ने अवधि नबढाए सबै बसको कागज बैंक तथा वित्तीय संस्थालाई नै बुझाउने उनले चेतावनी पनि दिए । उनले भने, ‘सरकारले हाम्रा कुरा सुनेन । टाट पल्टने अवस्थामा रहेका हामीले बैंकको पैसा तिरेनौँ भने बैंक पनि समस्यामा पर्लान् नि । उनीहरूलाई जोगाउन भए पनि म्याद थपियोस् । होइन भने हामी सबै बसका कागज र चाबी बैंक वित्तीय संस्थामा बुझाउँछौँ ।’ बस व्यवसायीको आग्रह स्वीकार नगरे २१ असारमा कागजपत्र र चाबी संकलन गरी २२ असारमा बुझाउने उनले बताए ।

राष्ट्रिय यातायात व्यवसायी महासंघका उपाध्यक्ष ऐनकुमार शाहीले सरकारले यातायात व्यवसायीका समस्या सम्बोधन नगरे गाडी चलाउन आह्वान गरेपछि पनि सवारीसाधन थन्क्याउनुपर्ने अवस्था आउने बताए । ग्यारेजमा थन्किएका सवारीसाधन बाहिर निकाल्न मात्र एकदेखि दुई लाख खर्च गर्नुपर्ने उनको भनाइ छ । ‘सवारीसाधन अहिलेसम्म थन्किँदा टायर काम नलाग्ने भएका छन् । इन्जिनसमेत नचल्ने अवस्थामा पुगेका छन्,’ उलने भने ।

महासंघका केन्द्रीय सदस्य केशव अधिकारीले बैंक, वित्तीय संस्थाले कूटनीतिक ढंगले व्यवसायीलाई फसाइरहेको आरोप लगाए । गाडीको ऋणमा जग्गा फसाउने काम भइरहेको उनले बताए ।

लामो समयसम्म सवारीसाधन नचल्दा यातायात मजदुरहरूको अवस्था पनि दयनीय भएको उनले बताए । यातायात मजदुरलाई वैकल्पिक रोजगारी सिर्जना गर्न उनले आग्रह गरेका छन् । कोभिड–१९ को त्रासको वेला थप जोखिम निम्त्याउन नचाहेको उल्लेख गर्दै उनले एयरलाइन्सले भन्दा राम्रो व्यवस्थापन गरी सवारीसाधन चलाउन तयार रहेको बताए ।