गरिमा विकास बैंकले दियो थप एक महिनाको ब्याज छुट :- आगमनखबर संवाददाता

आगमनखबर संवाददाता

नेपाल राष्ट्रबैंकबाट “ ख ” वर्गको इजाजत पत्रप्राप्त संस्था गरिमा विकास बैंक लिमिटेडले कोभिड -१९ बाट अत्याधिक प्रभावित यात्रुवाहक सवारी साधन परियोजनामा सोही सवारीसाधन समेतको धितोमा प्रवाहित ” हायर पर्चेज ” शीर्षक कर्जामा आफ्ना ऋणीहरुलाई नेपाल राष्ट्र बैंकको निर्देशन बमोजिमको छुट बाहेक थप एक महिनाको ब्याज छुट दिने भएको छ ।

नेपाल सरकारले २०७६ चैत्र ११ गतेदेखि घोषणा गरेको देशव्यापी बन्दाबन्दी लकाडाउन गरेका कारण यात्रुवाहक सार्वजनिक यातायात क्षेत्रलाई अत्याधिक प्रभाव परेको थियो ।

सवारी साधन धितोमा राखी बैंकले यात्रुवाहक कालो नम्बर प्लेट र पर्यटकको सवारीका लागि प्रयोग हुने हरियो नम्बर प्लेटका सवारी साधन बस , मिनीबस , माईक्रो बस , जिप र ट्याक्सी लगायत खरिदका लागि प्रवाह गरेको हायर पर्चेज शीर्षकका कर्जा उपभोग गरेका सेवाग्राही ऋणीहरुलाई नेपाल राष्ट्र बैंकको २०७७ बैशाख १६ गतेको निर्देशन बमोजिमको वैशाख , जेठ र असार महिनाको ब्याजदरमा २ प्रतिशत दिइएको छुटबाहेक २०७७ आषाढ महिनाको व्याज रकम राहत स्वरुप पूरै छुट दिने निर्णय गरी आफ्ना ऋणी हरुको मर्कालाई राहत दिएको छ ।

सम्बन्धित सम्पुर्ण सेवाग्राहीहरुले २०७७ आषाढ मसान्त भित्र गरिमा विकास बैंकको सम्बन्धित शाखा कार्यालयमा सम्पर्क गरी कर्जा नियमित गराई उक्त सुविधा लिन सकिने विज्ञप्तिमा उल्लेख छ।

विकास बैंकले कोभिड -१९ को महामारी तथा देशव्यापी लकडाउनका कारण अत्याधिक प्रभावित सर्वसाधारण यात्रु तथा पर्यटक वाहक सवारी साधन खरिदका लागि “ हायर पर्चेज ” शीर्षकमा कर्जा सुविधा उपभोग गर्नुहुने सेवाग्राहीहरुलाई प्रदान गर्न लागेको छुटले सम्बन्धित सेवाग्राहीहरुलाई थोरै भएपनि राहतको महशुस हुनेछ प्रकाशित विज्ञप्तिमा उल्लेख छ ।