आजदेखी निषेधाज्ञामा थप कडाइ: आन्तरिक उडानमा रोक, बेलुका पसलहरु खोल्न नपाइने

आगमनखबर संवाददाता

काठमाडौं । जिल्ला प्रशासन कार्यालयले निषेधाज्ञामा थप कडाइ गर्ने जनाएको छ ।

आज सोमबारदेखि बिहान १० बजेसम्म मात्र अत्यावश्यक पसलहरु खोल्न अनुमति दिने भएको छ ।

यसअघि बेलुका ५ बजेदेखि ७ बजेसम्म पसल खोल्न अनुमति दिएकोमा आजदेखी भने बेलुका पसलहरु खोल्न नदिने निर्णय पनि प्रशासनले गरेको छ । साथै मास्क नलगाउनेलाई होल्डिङमा राखेर जरिवाना गर्ने निर्णय समेत भएको छ ।

आइतबार बसेको जिल्ला कोभिड संकट व्यवस्थापन केन्द्र (डीसीसीएमसी) बैठकले अत्यावश्यक सेवाबाहेक अन्य कार्यालय एक चौथाइ कर्मचारीद्वारा सञ्चालन गराउने निर्णय गरेको छ । बैंक तथा वित्तीय संस्थाका एक चौथाइ शाखामा एक चौथाइ कर्मचारी राखी सञ्चालन गराउने भनिएको छ । उक्त कार्यका लागि नेपाल राष्ट्र बैंकले सहजीकरण गर्नेछ ।

बैठकले पर्यटन र अध्यागमन विभाग, नेपाल पर्यटन बोर्ड तथा नेपाल प्रहरीले संयुक्त रूपमा होटेल क्वारेन्टिनमा बस्नेहरूको नियमित अनुगमन गर्ने, अन्य जिल्लाका हकमा प्रदेश र स्थानीय तहले सम्बन्धित निकाय सम्मिलित संयन्त्र निर्माण गरी अनुगमन गर्ने, होम क्वारेन्टिनमा बसेकाहरूका सम्बन्धमा स्थानीय तहले अनुगमन गर्ने, होटेल क्वारेन्टिनको नियम पालना नगर्ने विदेशी नागरिकलाई जरिवानासहित तत्काल तिनका देश पठाइने प्रक्रिया अघि बढाउने निर्णय गरेको थियो ।

त्यस्तै सरकारले वैशाख २० गते मध्यरातीबाट आन्तरिक उडान र वैशाख २२ गतेबाट अन्तराष्ट्रिय उडानमा रोक लगाउने निर्णय गरेको छ।

आइतबार बेलुका बसेको मन्त्रिपरिषद्को बैठकले वैशाख २० गते मध्यरातीबाट आन्तरिक उडान र वैशाख २२ गतेबाट अन्तराष्ट्रिय उडानमा रोक लगाउने निर्णय गरेको परराष्ट्रमन्त्री तथा सत्तारुढ नेकपा एमालेका प्रवक्ता प्रदीप ज्ञवालीले बताए ।