जुम्लामा कैदीबन्दीसहित ३९ जनामा कोरोना संक्रमित

आगमनखबर संवाददाता

जुम्लामा कोरोना संक्रमितको संख्या पछिल्लो समयमा बढ्दो अवस्थामा रहेको छ ।

समुदायमा कोरोना भाइरस फैलिएपछि कर्णाली स्वास्थ्य विज्ञान प्रतिष्ठान शिक्षण अस्पतालमा परीक्षण गर्दा थप ३९ जनामा संक्रमण देखिएको हो ।

जिल्लाभर स्थानीय तहमा स्वाब परीक्षण गर्ने क्रममा चन्दननाथ नगरपालिकामा १६, जिल्ला कारागार जुम्लामा १० र नेपाल विद्युत् प्राधिकरण जुम्लाका ४ कर्मचारीमा कोरोना संक्रमण देखिएको कर्णाली स्वास्थ्य विज्ञान प्रतिष्ठानका अस्पताल निर्देशक डा. मंगल रावलले बताए ।

 त्यसैगरी तिला गाउँपालिकामा २, तातोपानी गाउँपालिकामा २, सिञ्जा गाउँपालिकामा १, पातारासी गाउँपालिकामा १, कनकासुन्दरी गाउँपालिमा १, पेस नेपालका कर्मचारी १, कृषि कार्यालयका १ गरी ३९ जनामा कोरोना संक्रमण देखिएको हो । थप ३९ सहित सक्रिय संक्रमितको संख्या जुम्लामा ८७ पुगेको छ ।

डा. रावलले भने, ‘धेरैजसो जुम्लाको चन्दननाथमा स्थायी ठेगाना र बसोबास गरिरहेका व्यक्तिहरू रहेकाले यहाँको सदरमुकाम खलङ्गा उच्च जोखिममा रहेको छ ।’

कर्णाली स्वास्थ्य विज्ञान प्रतिष्ठानको आइसोलेसनमा रहेका ११ र हिमा गाउँपालिकाको आइसोलेसनमा रहेका २१ गरी ३२ जना डिस्चार्ज भएका छन् । जुम्लामा कोरोना संक्रमित निको हुनेको संख्या १४१ पुगेको छ ।

• Categories
• #सम -सामयिक
• #स्वास्थ