सुदूरपश्चिमका थप ३ स्थानबाट कोरोना परिक्षण गरिने

हिम शाह

सुदूरपश्चिमका थप ३ स्थानबाट पनि कोरोना परिक्षणको काम हुने भएको छ । जिल्ला अस्पताल बैतडी, जिल्ला अस्पताल डोटी र सेती प्रादेशिक अस्पतालबाट पनि कोरोना परिक्षणको काम हुने भएको हो ।

ती स्थानमा कोरोना परिक्षण प्रयोगशाला स्थापनाका लागि भौतिक संरचना निर्माणको काम धमाधन भइरहेको सुदूरपश्चिम प्रदेश स्वास्थ्य निर्देशनालयका निर्देशक डाक्टर गुणराज अवस्थीले जानकारी दिनुभयो । उहाँले भन्नुभयो“ तिनवटै स्थानका लागि धनगढीमा प्रयोगशालाका लागि मेसिन पुगिसकेको र केही दिनभित्रै जडानको काम हुने र त्यसपश्चात परिक्षणको कार्य अगाडी बढाइने छ ।

बैतडीमा प्रयोगशाला स्थापनाका लागि भौतिक संरचना निर्माणको काम धमाधम भइरहेको जिल्ला अस्पताल बैतडीका प्रमुख डाक्टर बशन्तराज जोशीले जानकारी दिनुभयो । टाइलिंग र वायरिंगको काम सकिएको र अब आल्मोनियम पार्टेसनको काम भइरहेको छ उहाँले भन्नुभयो “साउन महिनाभित्र मेसिन बैतडी आइपुग्ने र त्यपश्चात जडान गरेर भदौ दोस्रो हप्ताबाट परिक्षणको थालनी गर्ने योजना छ ” डोटीमा भने यसअघिनै मेसिन पुगिसेकेको छ । हाल प्रयोगशाला स्थापना नहुँदा पिसिआर परिक्षणका लागि डडेल्धुरा धनगढी पठाउनुपर्ने बाध्यता रहेको छ ।

यसअघि कोरोना परीक्षण प्रयोगशाला स्थापनाका लागि विज्ञहरूको टोलीले अस्पतालमा पुगेर सम्भाव्यता अध्ययन समेत गरेको थियो । राष्ट्रिय जनस्वास्थ्य प्रयोगशालाका भाइरोलोजिष्ट डा. श्रवणकुमार मिश्रको टोलीले गत वैशाख ५ गते जिल्ला अस्पतालमा पिसीआर परीक्षण प्रयोगशाला स्थापनाका लागि सम्भाव्यता अध्ययन गरेको हो ।

प्रयोगशाला सञ्चालनमा आएमा कोरोनाको मात्रै नभएर अन्य मलिकुलर चेकजाँचका लागिसमेत सजिलो हुने विश्वास छ । साथै जिल्ला अस्पताल बैतडीको ५० शैइयाको भवन निर्माण कार्यसमेत जारी रहेकाले ल्याब स्थापना हुने कुराले भविष्यमा जिल्ला अस्पतालले प्रदान गर्ने सेवालाई प्रभावकारी बनाउन सहयोग पुग्ने विश्वास गरिएको छ ।

गत चैत १५ गते बसेको सुदूरपश्चिम प्रदेश मन्त्रिपरिषद्को बैठकले बैतडीसहित डोटी र कैलालीमा कोरोनाका सम्भावित बिरामीको नमुना परीक्षणका लागि प्रयोगशाला (ल्याब) स्थापना गर्ने निर्णय गरेको थियो । हाल सुदूरपश्चिमका कैलाली र डडेल्धुरा गरेर २ स्थानका कोरोना परिक्षणको काम भइरहेको छ ।

• Categories
• #सम -सामयिक
• #स्वास्थ