ओम्नीको स्वास्थ्य सामग्री खरिद र १० अर्ब खर्च प्रकरणको छानबिन :-

आगमनखबर संवाददाता

काठमाडौँ — कोरोना भाइरस संक्रमण रोकथाम तथा नियन्त्रणका लागि चीनबाट खरिद गरिएका स्वास्थ्य सामग्रीमा भएको अनियमितता ,ओम्नीको स्वास्थ्य सामग्री खरिद र १० अर्ब खर्च प्रकरणमा सदनदेखि सडकसम्म अनियमितता भएको भन्दै छानविनको माग उठ्दै आएको र  नेपाली सेनाले खरिद गरेको स्वास्थ्‍य सामग्री पनि बजार मूल्यभन्दा महंगो भएकाले अनियमितता भएको आशंका गर्ने ठाउँ भएकाले छानबिन गर्न प्रतिनिधिसभाको सार्वजनिक लेखा समितिले स्वास्थ्य तथा जनसंख्या विभागका सचिव लक्ष्मण अर्याल र स्वास्थ्य सेवा विभागका महानिर्देशक डा. दिपेन्द्ररमन सिंहलाई बोलाएको छ ।

ओम्नी बिजनेस प्रालिले स्वास्थ्य सामग्री खरिदका कागजातको प्रारम्भिक अध्ययनबाट मन्त्रालय र विभागले ठेक्का दिने क्रममा प्रक्रिया नपुर्‍याएको, कानुनी अधिकार नभएका स्वास्थ्य तथा जनसंख्यामन्त्री भानुभक्त ढकालका विज्ञ सल्लाहकार डा. खेम कार्कीले सम्झौता गर्ने जिम्मेवारी दिइएको स्वास्थ्य सामग्री खरिद प्रक्रियामा भएको अनियमितताको छानबिन गर्ने क्रममा पहिलो चरणमा सचिव र महानिर्देशकलाई समितिको बैठकमा बोलाइएको हो ।

सार्वजनिक लेखा समितिले स्वास्थ्य सामग्री खरिदसम्बन्धि कागजात मन्त्रालय र विभागबाट मगाएर अध्ययन गरेपछि दुवैलाई बोलाउने निर्णय गरेको हो । ती कागजातबाट निस्केका निष्कर्ष समेटिएको संक्षिप्त प्रतिवेदन समितिमा रहेका सांसदहरूलाई वितरण गरिसकिएको छ । त्यसपछि उपप्रधान तथा रक्षामन्त्री ईश्वर पोखरेल नेतृत्वको उच्चस्तरीय समितिलाई पनि बोलाइने तयारी भएको छ ।

लेखा समितिका सभापति भरत शाहले भोलिको बैठकमा ओम्नी ग्रुप र नेपाली सेनाले खरिद गरेको स्वास्थ्य सामग्रीमा भएको अनियमितताको विषय एजेण्डा रहेको जानकारी दिए। शाहका  अनुसार कोरोना भाइरस रोकथाम तथा नियन्त्रणमा सरकारले खर्च गरेको १० अर्बमा भएको अनियमितताको विषयमा पनि छलफल प्रारम्भ हुनेछ। 

• Categories
• #अर्थतन्त्र
• #स्वास्थ