नक्कली भ्याट बिल बनाएर २० करोड रुपैयाँ राजस्व छली

छापाबाट

काठमाडौं । पछिल्लो समय सरकारले बजार अनुगमनलाई तीव्रता दिएर कर्मचारी संयन्त्रलाई थप बलियो बनाए पनि अझै राजस्व छलीको शृंखला रोकिएको छैन । मुलुक संकटमा परेको मौकामा राजस्व छली गर्नेहरू अझ सक्रिय हुन सक्ने भन्दै बजार अनुगमन कार्यलाई तीव्रता दिएको राजस्व अनुसन्धान विभागले झुटा तथा नक्कली मूल्य अभिवृद्धि कर (भ्याट) बिल बनाएर करिब २० करोड रुपैयाँ राजस्व छलेको फेला पारेको छ ।

विभिन्न तरिका अपनाएर राजस्व छल्नेविरुद्ध आक्रामक रूपमा अघि बढेको राजस्व अनुसन्धान विभागले झुटा तथा नक्कली भ्याट बिल प्रयोग गरी करोडौं रुपैयाँ राजस्व चुहावट गरेको अभियोगमा विभिन्न फर्म, कम्पनी र व्यक्तिविरुद्ध अदालतमा मुद्दा दायर गरेको छ ।

विभागले राजस्व छलीको आरोपमा विभिन्न कम्पनीका सञ्चालक र कारोबारीसहित पाँच जनाविरुद्ध राजस्व छलिएको रकम बराबर बिगो दाबीसहित उच्च अदालत पाटनमा मुद्दा दायर गरेको छ । विभागले उनीहरूमाथि कुल १९ करोड ९६ लाख रुपैयाँ बिगो बराबरको राजस्व छली गरेको अभियोगमा मुद्दा दायर गरेको हो ।

अनुसन्धानको क्रममा राजस्व छलिएको रकमसहित बिगो असुल गरी जरिमाना र कैद सजाय मागदाबीसहित उच्च अदालत पाटनमा मुद्दा दायर गरेको विभागले जनाएको छ । विभागका अनुसार झुटा तथा नक्कली मूल्य अभिवृद्धि कर (भ्याट बिल) बिजक प्रयोग गरी राजस्व छली गर्ने कविला सप्लायर्स सेन्टरका नवलकिशोर चौधरीलाई २ करोड १४ लाख ३० हजार २ सय ३८ रुपैयाँ, शिवम प्याकेजिङ एन्ड सप्लायर्सका सञ्चालक सीतादेवी जयसवालबाट ५ करोड ८८ लाख ६५ हजार ९ सय १९ रुपैयाँ र गौतम सप्लायर्सका मुकेशप्रसाद चौधरीबाट ५ करोड ३२ लाख १६ हजार १ सय ८८ रुपैयाँ गरी १३ करोड ३५ लाख १२ हजार ३४५ रुपैयाँ बिगो असुल गरी जरिमाना र कैद सजाय मागदाबीसहित उच्च अदालत पाटनमा मुद्दा दायर गरिएको छ ।

राजस्व छलीमा संलग्न कविला सप्लायर्स सेन्टरका सञ्चालक चौधरी भारत स्थायी ठेगाना भई हाल ललितपुर महानगरपालिका–२ सानेपामा बस्दै आएका थिए भने शिवम प्याकेजिङ एन्ड सप्लायर्सका प्रोपाइटर जयसवाल धनुषाको जनकपुर उपमहानगरपालिका स्थायी घर भई हाल ललितपुरको सानेपामा बस्दै आएकी थिइन् ।

यसैगरी विभागले झुटा तथा नक्कली भ्याट बिजक प्रयोग गरी राजस्व छली गर्ने शिवम ट्रेडर्स एन्ड सप्लायर्सका सञ्चालक जगदीश सहनी मलाहलाई ४ करोड ७९ लाख ६९ हजार ४ सय ४७ रुपैयाँ बिगो असुल गरी जरिमाना र कैद सजाय मागदाबी लिई उच्च अदालत पाटनमा मुद्दा दायर गरेको छ ।

राजस्व चुहावट गर्ने नियतले गलत विवरण घोषणा गरी राजस्व छलीमा संलग्न पोखरास्थित अनुष्का मल्टिप्रपोज कम्पनीका शिवलाल तिम्लसिनासहित तीन जनाबाट १ करोड ८२ लाख ५३ हजार ४ सय ६१ रुपैयाँ बिगो असुल गरी जरिमाना र कैद सजाय मागदाबीसहित उच्च अदालत जनकपुर अस्थायी इजलास वीरगन्जमा मुद्दा दायर गरिएको विभागले जनाएको छ ।

विभागका महानिर्देशक दीर्घराज मैनालीले विभिन्न तरिका अपनाएर राजस्व छल्नेहरूविरुद्ध विभाग आक्रामक रूपमा प्रस्तुत भएको बताए । उनले अनुगमन एवं विशेष सुराकीका आधारमा विभागले एकैपटक करोडौं रुपैयाँ राजस्व छलीमा संलग्नहरूको अवैध धन्दा फेला पारेको जानकारी दिए ।

राजस्व छलीमा संलग्न व्यवसायीले फरक फरक तरिका अपनाएर राजस्व छल्ने गरेको भेटिएको विभागले जनाएको छ । केहीले वस्तु तथा सेवा उत्पादन र स्थानीय खरिद तथा आयात नगरी बिक्री मात्रै गरेको, मूल्य अभिवृद्धि कर (भ्याट) विवरणमा तथा आय विवरणसमेत दाखिला नगरेको, मालवस्तुको खरिद गरेको भनिएका फर्मलाई बैंकमार्फत भुक्तानी नगरी बिजकको मात्र हस्तान्तरण गरी राजस्व चुहावट गरेको पाइएको अनुसन्धानको क्रममा पुष्टि भएको विभागको दाबी छ ।

विभागका अनुसार अब यी कम्पनीमाथि राजस्व अनुसन्धान तथा नियन्त्रण ऐन, २०५२ को दफा २ बमोजिम राजस्व चुहावट गरेको कसुरमा कारबाही हुनेछ । २०७४ सालको २३ फागुनमा प्रधानमन्त्री केपी शर्मा ओलीले राजस्व अनुसन्धान विभागलाई प्रधानमन्त्री तथा मन्त्रिपरिषद्को कार्यालयअन्तर्गत ल्याएदेखि अहिलेसम्म राजस्व छली गर्ने धेरै व्यक्तिविरुद्ध विभिन्न अदालतमा मुद्दा दायर गरिएको विभागले जनाएको छ ।राजधनी दैनिकमा खबर छ ।