प्रेस स्वतन्त्रता सेनानी झा पुरस्कृत

आगमनखबर संवाददाता

सप्तरी। सप्तरीको राजविराजमा आज आयोजित एक कार्यक्रममा प्रेस स्वतन्त्रता सेनानी वैद्यनाथ झालाई लक्ष्मी–मुक्ति स्मृति पत्रकारिता पुरस्कार प्रदान गरिएको छ ।

नेपाल पत्रकार महासङ्घ सप्तरीमा आयोजित कार्यक्रममा नगद रु पाँच हजार राशिसहित ‘आजको वातावरण’ दैनिकका सम्पादक प्रकाशकसमेत रहनुभएका झालाई सम्मानपत्र प्रदान गरिएको छ । नेपाल पत्रकार महासङ्घ सप्तरीका अध्यक्ष श्रवणकुमार देवसहित पूर्वअध्यक्ष शिवहरिप्रसाद भट्टराई, विष्णु मण्डल, व्यासशङ्कर उपाध्याय र धीरेन्द्रप्रसाद साहले संयुक्तरूपमा पुरस्कार राशि तथा सम्मानपत्र प्रदान गर्नुभयो ।

स्मृति कोषका संस्थापक एवं नेपाल पत्रकार महासङ्घका पूर्व केन्द्रीय उपाध्यक्ष शिवहरिप्रसाद भट्टराईद्वारा स्व पिता मुक्तिनाथ भट्टराई र माता लक्ष्मी भट्टराईको स्मृतिमा तीन वर्षअघि पुरस्कार स्थापना गरिएको हो । राजविराजमा ०७५ पुस २६ गते एक कार्यक्रममा भट्टराईले स्व बुवाआमाको स्मृतिमा रु पाँच हजार राशिको पुरस्कारको घोषणा गर्नुभएको थियो । दुई वर्षअघि यो पुरस्कार नेपाल पत्रकार महासङ्घ सप्तरीका पूर्वअध्यक्ष व्यासशङ्कर उपाध्यायलाई प्रदान गरिएको थियो ।

• Categories
• #पत्रपत्रिका
• #मुख्य समाचार