नेकपा सरकारको निर्देशन डा. केसीलाई औषधि किन्‍न पनि अवरोध

आगमनखबर संवाददाता

सत्याग्रह स्थगित गरेपछि स्वास्थ्य शिविर चलाउन गाउँ जान थालेका डा. गोविन्द केसीलाई औषधि किन्नसमेत अवरोध गरिएको छ । 

शुक्रबार बिहान कर्णाली स्वास्थ्य विज्ञान प्रतिष्ठानका सुरक्षाकर्मीले ‘माथिको आदेश’ भन्दै फार्मेसीमा पस्न नदिएर अवरोध गरेका हुन् ।

डा. केसीले हाडजोर्नीसम्बन्धी दुई प्रकारको औषधि बाहिर नपाउने र प्रतिष्ठानको फार्मेसीमा मात्र पाउने भएपछि लिन जाँदा रोकिएको बताए । 

कोरोना संकटको कारण सबैको आग्रहमा सत्याग्रह रोकेपछि सिँजा, पातारासी क्षेत्रमा जाने योजना बनाएँ सँगै रित्तै जानुभन्दा बिरामीका लागि औषधि लग्नुपर्‍यो भनेको त भित्र छिर्नै दिएनन् केसीले भने ।

करिब २ महिनादेखि कर्णालीमा रहेका डा. केसीलाई स्थानीय तह र स्थानीय प्रशासनले बिरामीको उपचार र स्वास्थ्य परीक्षणमा पनि अवरोध गर्दै आएका छन् । 

केन्द्र सरकारको निर्देशनमा आफूमाथि यस्तो अवरोध हुँदै आएको डा. केसीको भनाइ छ ।

स्वयंसेवा गर्न खोज्दा पनि अवरोध गरिँदा आफू अचम्मित भएको उनले बताए । अस्पताल निर्देशक डा. मंगल रावलले भने आफू ५ दिनको लागि आइसोलेसनमा बसेको र अवरोधसम्बन्धी जानकारी नभएको बताए ।

• Categories
• #स्वास्थ