मुक्तकका केही टुक्राटाक्रीहरू : नवराज रेग्मी

नवराज रेग्मी

मुक्तकका केही टुक्राटाक्रीहरू

१.
आउँदैछु जवानीको धूप जोगाएर राख प्रिया
कुरुप शहरमा रुप जोगाएर राख प्रिया
यो चिकन, यो मटन देखेरै वाक्क भा’छ
अमिलो गुन्द्रुकको सूप जोगाएर राख प्रिया ।

२.
सीमा समातेर देश रोएको छ
तुना समातेर भेष रोएको छ
बनाउँछु भन्नेहरुले नै भत्काइरहेको देख्दा
शून्य–शून्य उराठिलो परिवेश रोएको छ ।

३.
भट्टीमा साधु मातेको देख्छु
सीताले यौवन साटेको देख्छु
अचम्म लाग्छ मलाई त आजभोलि
खुनी हातहरुले बाती कातेको देख्छु ।

४.
सँगसँगै अ‍ोराली झरेको सम्झ प्रिया
साउने पँधेरीमा पानी भरेको सम्झ प्रिया
गाई चराउन जाँदा कतै घना जंगलमा
च्याप्प समातेर माया गरेको सम्झ प्रिया ।

५
हिमाल जलेर खरानी भएको देख्न सक्तिनँ भन्छिन् आमा
आफू मरेको आफ्नै कथा लेख्न सक्तिनँ भन्छिन आमा
यो बतास, यो हुरी, यो आँधी झन बेगिलो हुँदै गा’छ
म थाकेँ, बेसरी थाकेँ, छेक्न सक्तिनँ भन्छिन् आमा । .

६.
यी चिठीहरु हुन् तिम्रा म छोड्न आएको छु
बेस्वादको यो सम्बन्ध तोड्न आएको छु
च्यातेर फाल प्रिया मेरा तस्बिरहरु सबै
जिन्दगीलाई अब अन्तै मोड्न आएको छु ।

७.
आफ्नै मुटु जलेको हेरेर फर्केको छु
आफ्नै माया गलेको हेरेर फर्केको छु
भो बुझियो जिन्दगी यसरी चल्दो रहेछ
आफ्नै विश्वासले छलेको हेरेर फर्केको छु ।

८.
रुन्न भनेर नरुन कहाँ सकिन्छ र ?
हुन्न भनेर नहुन कहाँ सकिन्छ र ?
आडैमा तिमी छौ, बैँस मातेको छ
छुन्न भनेर नछुन कहाँ सकिन्छ र ?

नवीन आहत