कांग्रेस नेतृ सरस्वती बजिमयद्वारा केन्द्रीय सदस्यमा उम्मेदवारी दर्ता

आगमनखबर संवाददाता

खोटाङ । नेपाली कांग्रेसको १४ औँ महाधिवेशनमा नेपाली कांग्रेसकी नेतृ सरस्वती बजिमयले आदिवासी जनजाति महिला तर्फ केन्द्रीय सदस्य पदमा उम्मेदवारी दर्ता गर्नुभएको छ।

दुई दशक लामो समय खोटाङबाट कांग्रेसमा सक्रिय राजनीति गर्दै आउनुभएको बजिमय विक्रम संवत २०५७ सालमा नेपाल महिला संघ जिल्ला सभापति हुँदै २०५८ सालमा महिला विभाग केन्द्रीय सदस्य र २०६४ सालमा नेपाल महिला संघ केन्द्रीय कोषाध्यक्ष समेत बन्नु भएको थियो।

यस्तै २०७० सालमा महासमिति सदस्य नेपाली कांग्रेस खोटाङ र संविधानसभा सदस्य समेत रहनुभएको बजिमयले पार्टीलाई संगठित, समावेशी र गतिशील बनाउन र कांग्रेसमा सबै वर्ग र क्षेत्रका व्यक्तिहरु अट्ने तथा समाजको सबै क्षेत्रले भरोसा गर्ने अवस्था निर्माणगर्न नेपाली कांग्रेसको १४ औं महाधिवेशनमा केन्द्रीय सदस्यको उम्मेदवारी दिएको बताउनुभयो ।

उनले आफुलाई नेपाली कांग्रेसको केन्द्रीय सदस्यमा स्थापित गराउन आफुलाई मतदान गर्न देश विदेशबाट आएको महाधिवेशन प्रतिनु र आफ्नो निकट साथीभाई शुभेच्छुकहरुमा हार्दिक अनुरोध सहित गर्नुभएको छ। उनलाई प्रस्तावकको रुपमा नेपाली कांग्रेस खोटाङको केन्द्रीय महाधिवेशन प्रतिनिधि एवम् हलेसी तुवाचुङ नगरपालिकाकि उपमेयर बिमला राई तथा समर्थकको रुपमा सोलुखुम्बुकि गान्धीमाया तामाङ रहेका छ।

बजिमय खोटाङ जिल्लाको कुशल राजनीतिज्ञ शीर्ष नेता हुन्। उनले नेपाली कांग्रेसको १४ औं महाधिवेशन अन्तरगत नेपाली कांग्रेस खोटाङको ७ औं जिल्ला अधिवेशनबाट भारी मतले केन्द्रीय महाधिवेशन प्रतिनिधिमा विजयी हुनुभएको हो।