एनआरएनए अमेरिकाले ३ करोड बढीको स्वास्थ्य सामाग्री नेपाल पठायो

आगमनखबर संवाददाता

अमेरिका। गैरआबशीय नेपाली संघ (एनआरएनए ) अमेरिकाले ३ करोड १६ लाख बराबरको स्वास्थ्य उपकरण र सामाग्री नेपाल पठाएको छ।

एनआरएनए अमेरिकाको तर्फबाट कोभिड–१९ महामारी विरुद्धको अभियानमा नेपाल सरकारलाई सहयोग पुर्‍याउने लक्षका साथ तीन करोड १६ लाख नेपाली रुपैयाँ भन्दा बढी मूल्यको स्वास्थ्य उपकरण र सामाग्री नेपाल पठाएको हो ।

शुक्रवार अमेरिकाको युटाह राज्यको साल्ट लेक सीटीबाट ९ हजार ६ सय १० पाउन्ड अर्थात् ४ दशमलव ८ टन बराबरको स्वास्थ्य उपकरण सामाग्री लिएर अमेरिकी सेनाको जहाज नेपालका लागि उडान भरेको संघले जनाएको छ ।

एनआरएनए अमेरिका र अमेरिकाको सेक्रेटरी अफ डिफेन्स अन्तरगत अमेरिकी सेना मार्फत सहयोग सामाग्री ढुवानीमा सहमति भएपछि अमेरिकी सेनाको जहाजले शुक्रवार स्वास्थ्य उपकरण र सामाग्री लिएर उडान भरेको हो ।

आगामी दिनमा आपत् – विपद्को समयमा गैर आवासीय नेपाली सङ्घ अमेरिकाले अमेरिकी सेनाको जहाजमा सहयोग सामाग्री नेपालसम्म निःशुल्क ढुवानी गराउन सक्ने गरी सहमति समेत भएको छ । यो सहमतिसँगै प्रारम्भ भएको निःशुल्क ढुवानी गैर आवासीय नेपाली सङ्घ अमेरिकाको नेपाल र नेपालीको सहयोग अभियानका लागि कोसे ढुङ्गा साबित भएको संघले जारी गरेको प्रेस बिज्ञप्तिमा उल्लेख छ ।

सङ्घ अमेरिकाले अक्सिजन कन्सनटेटर ६४ थान, अक्सिजन पल्स अक्सिमिटर ३० बक्स, भोल्ट स्टेप अप–डाउन ट्रास्फरमर २६ थान, ठुलो परिमाणमा एन ९५ मास्क, केएन ९५ मास्क २ हजार १०८ बक्स, ठुलो परिमाणमा फेस सिल्ड, विभिन्न साइजको सर्जिकल गाउन सुट ११० बक्स, ठुलो परिमाणमा स्वाव टेस्टर, सी प्याप उपकरण १५ बक्स सहित पाँच प्यालेटमा ९ हजार ६सय १० पाउन्ड अर्थात् ४ दशमलव ८ टन सामाग्री नेपाल पठाइएको हो ।

गैर आवासीय नेपाली सङ्घ अमेरिका प्रवक्ता तोया दाहालद्वारा जारी बिज्ञप्तिमा भनिएको छ ’सहमतिको आधार तयार गर्न महत्त्वपूर्ण सहयोग गर्नुहुने सेक्रेटरी अफ डिफेन्स अन्तरगतको युटाह नेशनल गार्ड स्टेट पार्टनरसिप कार्यक्रमका निर्देशक मेजर जनरल विलियम के बेइसिन्जर प्रति गैर आवासीय नेपाली सङ्घ अमेरिका परिवार आभारी ब्यक्त गरेको छ । कार्यक्रममा जोड्न र सहयोग जुटाउन अथक मेहनत गर्नुहुने अमेरिका स्थित नेपाली दूतावासका होमकान्त भण्डारी, डाइरेक्ट रिलिफका ड्यानियल होभी, स्मृत कम्वोइ, डाक्टर विष्णु नेपाल, अवकाश प्राप्त अमेरिकी सैनिक अधिकृत श्याम ज्ञवाली, महावाणिज्य दुत रीशी ढकाल, सेवा इन्टनेशनलका अचलेश अमर, स्वदेश कटोच र शिव मिश्र, गैर आवासीय नेपाली सङ्घ अमेरिकाका पुर्व सल्लाहाकर संकेस सुबेदी लगाएत लाई धन्यवाद ज्ञापन गरेको छ ।

अमेरिकी सेनाको जहाज पठाउन लागिएको सहयोग उपकरण र सामाग्रीको जाँच पडतालको समयमा युटाह नेशनल गार्डको परिसरमा पुगेर गैर आवासीय नेपाली सङ्घ अमेरिकाका कोषाध्यक्ष राजीव श्रेष्ठले प्रक्रियागत रूपमा भएका सबै कामको फेहरिस्त तयार गर्नु भएको छ । स्वास्थ्य उपकरण र सामाग्री अगष्ट ३१ तारिख नेपाल पुग्ने छ । नेपाल र नेपालीलाई कोभिड महामारी विरुद्धको अभियानमा सहयोग स्वरूप पठाइएका स्वास्थ्य उपकरण र सामाग्री नेपाल सरकारलाई हस्तान्तरण गर्न गैर आवासीय नेपाली सङ्घ अमेरिकाका अध्यक्ष बुद्धि सागर सुवेदी काठमाडौँ प्रस्थान गर्नु भएको बिज्ञप्तिमा उल्लेख छ ।

अध्यक्ष सुवेदीले गैर आवासीय नेपाली सङ्घ अमेरिकाको तर्फबाट नेपाल सरकार स्वास्थ्य मन्त्रालयलाई सबै सामान हस्तान्तरण गर्नु हुनेछ । हस्तान्तरण कार्यक्रममा परराष्ट्र मन्त्रालय, नेपाली सेना, अमेरिकी राजदूतावास, अमेरिकी अन्तर्राष्ट्रिय सहयोग नियोग यूएसएआइडीका प्रतिनिधि पनि सहभागी हुने कार्यक्रम रहेको उल्लेख गरेको छ ।

नेपाल र नेपालीका लागि सहयोग अभियानमा डिरेक्ट रिलिफ, सेवा इन्टरनेशनल, गैर आवासीय नेपाली सङ्घ अमेरिका र च्याप्टरहरू, इन्डिया कोभिड एसओएस, वीवीएस स्वामी नारायण मन्दिर चिनो हिल लस एन्जलस, लस एन्जलस गुरुङ समाज,नेपालीज एसोसिएसन अफ ह्विस्टन, नाफा, डोटेरा, सिख गुरुद्वारा सानहोजे, गिरिजा प्रसाद कोइराला फाउन्डेशन अमेरिका, अमेरिका स्थित नेपाली राजदूतावासलाई धन्यवाद दिन चाहन्छौ ।

एक महिनाको छोटो अवधिमा यो काम सम्पन्न गर्न अध्यक्ष बुद्धि सागर सुवेदी, उपाध्यक्ष सुमन थापा,महासचिव अन्जन चौलागाई, सचिव अनुप खनाल, कोषाध्यक्ष राजीव श्रेष्ठ, युवा संयोजक त्रिभुवन पाण्डे, क्षेत्रीय संयोजकहरू श्रीराम थापा, समर बहादुर बुढाथोकी र किरण बस्नेत लगायत कार्यसमितिका पदाधिकारी, बोर्ड सदस्यहरू साथै च्याप्टरका पदाधिकारी र बोर्ड सदस्यहरूले महत्त्वपूर्ण भूमिका निर्वाह गर्नु भएको छ ।

यस अघि गैर आवासीय नेपाली सङ्घ अमेरिकाले गत जुन १५ तारिख कोभिड १९ विरुद्ध नेपाल र नेपालीलाई सहयोग पठाउन गरेको प्रयास असफल भएको थियो । सेक्रेटरी अफ डिफेन्स अन्तरगतको यो कार्यक्रममा गैर आवसीय नेपाली सङ्घ अमेरिकाको तर्फबाट संयोजन गर्न अध्यक्ष बुद्धिसागर सुवेदीले कोषाध्यक्ष राजीव श्रेष्ठलाई जिम्मेवारी सुम्पनु भयो । यस पटक नयाँ ढङ्गले काम आरम्भ गरी छोटो अवधिमा वर्तमान कार्यसमितिले कोभिड–१९ विरुद्धको अभियानमा सहयोग पठाउने सफलता प्राप्त गरेको छ । यस अभियानमा प्रत्यक्ष र अप्रत्यक्ष रूपमा जोडिएर सहयोग गर्नुहुने सबै प्रति गैर आवासीय नेपाली सङ्घ राष्ट्रिय समन्वय परिषद् अमेरिका आभारी छ ।