उपराष्ट्रपतिलाई प्रम सल्लाहकार थापाको प्रश्न : जिम्मेवारी, कर्तव्य र दायित्व अनि नैतिकताकाे संकटमा उपचार के हुन्छ ?

आगमनखबर संवाददाता

काठमाडौँ प्रधानमन्त्रीका प्रेस सल्लाहाकार सुर्य थापाले उपराष्ट्रपति नै राष्ट्रपतिले गरेको कार्यक्रममा उपस्थिति नभएकोमा टिप्पणी गरेका छन् ।

सल्लाहाकार थापाले उपराष्ट्रपति नै राष्ट्रपति भवनमा आयोजित सपथग्रहण समारोहमा उपस्थित नहुनु र राष्ट्रपतिले संविधानबमोजिम लिनुभएको निर्णयमा व्यक्तिगत कुण्ठा र बकबास गर्दै (पत्रकार महासंघको महाधिवेशन उद्घाटनका अवसरको प्रचण्डपथीय मन्तव्य) हिड्नु झन् गैरजिम्मेवारी हो भएको बताएका छन् ।

सुर्य थापाले सामाजिक संजालमा लेखेको स्टाटस यस्तो छ :

अस्पताल भर्ना भएको वा उपस्थित हुन नसक्ने गरी गंभीर स्वास्थ्य समस्यामा रहेको अवस्थामा पूर्व जानकारी गराएर बाहेक उपराष्ट्रपति र सभामुखको पदीय जिम्मेवारी एवं कर्तव्य र संविधानबमोजिमको उपस्थिति स्वेच्छिक होईन र हुनै सक्दैन ।

उपराष्ट्रपति नै राष्ट्रपति भवनमा आयोजित सपथग्रहण समारोहमा उपस्थित नहुनु र राष्ट्रपतिले संविधानबमोजिम लिनुभएको निर्णयमा व्यक्तिगत कुण्ठा र बकबास गर्दै (पत्रकार महासंघको महाधिवेशन उद्घाटनका अवसरको प्रचण्डपथीय मन्तव्य) हिड्नु झन् गैरजिम्मेवारी हो । अझ नबोल्ने सम्मानित पदमा बसेर यसढंगले गैरजिम्मेवार बन्न त किमार्थ पनि मिल्दैन ।

पूर्व राष्ट्रपति, पूर्व प्रधानमन्त्री, पूर्व प्रधानन्याधीशहरू, पूर्व उपकूलपति र पूर्व प्रमुख निर्वाचन आयुक्तजस्ता “पूर्वहरू” को बिजोग त यसअघि नै सार्वजनिक हुँदै आएको अधोपतन छँदै थियो ।

बहालवाला उपराष्ट्रपति रसभामुखको यसप्रकारको अनुपस्थिति, बहिस्कार र कर्तव्यच्यूत रवैया देख्नेहरूका लागि पो लाजमर्दो भयो ! गरिमामय पदमा आसीन हुने, तर उक्त पदलाई विपक्षी बनाएर दायर रिटमा पक्षमा बहस गर्न वकिल पठाउने, बोलाईएको बैठकमा उपस्थित नहुने, निर्णय गर्न अवरोध र अर्घेल्याई गर्ने, निर्णयविरुद्ध न्यायालयमा स्वयं रिट लिएर जाने, सपथग्रहण समारोह बहिस्कार गर्ने,अनि पदीय मर्यादा र गरिमाकाे खिल्ली उडाएर नै राज्यका प्रमुख पदाधिकारीकाे स्थानमा बसिरहने/ टाँस्सिइरहने ? सरकारविरुद्द विभिन्न अनुचित भेटघाट, गाेप्य र रहस्यमय बैठकहरू आआफ्ना निवासमा आयाेजना गरिरहने – यो के रवैया यो ? राज्यका प्राप्त पद र हैसियत धान्न आवश्यक याेग्यता, क्षमता, हैसियत, जवाफदेहिता र जिम्मेवारीबाेधकाे कमी, अभाव र हैसियतकाे दुरूपयाेगकाे समस्या नै देखिएकाे हाे कि याे खासमा के हाे ?

पद, जिम्मेवारी, कर्तव्य र दायित्व अनि नैतिकताकाे संकटमा उपचार के हुन्छ ? सचेत नागरिक तहमा उठिरहेका गंभीर प्रश्नहरू !