कांग्रेस सभापति देउवाद्वारा प्रदर्शनमा सहभागी सबैलाई बधाई तथा आभार ब्यक्त

आगमनखबर संवाददाता

काठमाडौं । नेपाली कांग्रेस सभापति शेरबहादुर देउवाले प्रदर्शनमा सहभागी सबैलाई बधाई तथा आभार ब्यक्त गरेका छन ।

सोमबार एक बिगप्ती जारी गरी देउवाले संसद विघटनको असंवैधानिक र अलोकतान्त्रिक कदमका विरुद्ध ७७ वटै जिल्लाहरुमा नेपाली कांग्रेस जिल्ला कार्यसमितिहरुले आज आयोजना गरेको विरोध प्रदर्शन व्यापक सहभागिता साथ सफलतापूर्वक सम्पन्न भएको जनाएका छन ।

प्रदर्शनले के.पी. शर्मा ओली नेतृत्वको नेपाल कम्युनिष्ट पार्टीको सरकारले गरेको प्रतिनिधिसभा विघटनको असंवैधानिक र अलोकतान्त्रिक, सर्वसत्तावाद उन्मुख कदम एवं मुलुकमा व्याप्त भ्रष्टाचार, कोभिड—१९ नियन्त्रण र व्यवस्थापनमा सरकारको असफलता र कुशासनको विरुद्ध जनभावना अभिब्यक्त गरेको जारी बिगप्तीमा भनिएको छ ।

देउवाले भनेका छन प्रदर्शनमा सहभागी सबै दिदीबहिनी—दाजुभाइमा नेपाली कांग्रेस पार्टीका तर्फबाट आभार प्रकट गर्दछु । प्रदर्शन सफल बनाउन अहोरात्र खट्नु हुने जिल्ला कार्यसमितिका साथीहरु, भ्रातृ एवं शुभेच्छुक संघका साथीहरू संगै पार्टीको सबै तहका आदरणीय साथीहरू, पार्टीका शुभचिन्तक र शुभेच्छुकहरु तथा सामाजिक संजाल मार्फत भूमिका निर्वाह गर्ने विशेषतः युवाहरू सबैमा बधाई ज्ञापन गर्दछु ।

कार्यक्रम घोषणा भए देखि समापन हुंदासम्म निरन्तर समाचार सम्प्रेषण गर्नुहुने आदरणीय पत्रकार मित्रहरूलाई धन्यवाद ज्ञापन गर्दछु बिगप्तीमा उल्लेख छ ।