प्रचण्डको चेतावनी: यो हाम्रो आन्दोलनको सानो ट्रेलर मात्र हो, फिल्म त आउन बाकी नै छ

दिनेश अर्याल

काठमाडौं । नेकपा (प्रचण्ड–माधव) पक्षका अध्यक्ष प्रचण्डले अहिले आफुहरुले गरेको विरोध सभा सानो ट्रेलर मात्रै भएको बताएका छन् ।

मंगलबार प्रधानमन्त्री ओलीको संसद भङ्ग गर्ने कदमविरुद्ध काठमाडौँमा भएको शक्ति प्रदर्शनका क्रममा भृकुटीमण्डपमा भएको विरोधसभालाई सम्बोधन गर्दै नेता प्रचण्डले आफुहरुले गरेको विरोधसभा सुरुवाती मात्रै भएको र सरकारले  आफ्नो निर्णयलाई नसच्याय थाप संकटको सामना व्यहोर्नुपर्ने चेतावनी दिएका छन्।

हाम्रो यो सुरुवाती चरण मात्रै हो कार्यक्रममा बोल्दै प्रचण्डले भने, ‘हाम्रो आन्दोलन कुनै पनि हालतमा रोकिनेवाला छैन, सरकारले आफ्नो निर्णय फिर्ता नगरेसम्म हामीले हाम्रो संबिधान बचाउको आन्दोलन जारि राख्नेछौ।’

आफूहरुले नै बनाएको प्रधानमन्त्रीले संविधान र संघीय लोकतान्त्रिक गणतन्त्रमाथि प्रहार गर्‍यो भन्नुपर्दा आफूहरुलाई अप्ठ्यारो लागेको उनले बताए ।

केपी शर्मा ओलीको पहिल्यैदेखिको नियतिलाई उनले प्रस्ट पार्दै उनले भने, ‘मैले नै हो पार्टी एकताको लागि प्रस्ताव लिएर गएको थिए । उहा बयलगाडाको सिद्धान्तमा रहेको मलाई पहिल्यै नै थाहा थियो । उहा गणतन्त्रको विरोधी हो भन्ने पनि मलाई थाहा थियो । प्रतागमनकारी ठाउमा हुनुहुन्छ धर्मनिरपेक्षता विरुद्धमा हुनुहुन्थ्यो भन्ने मलाई पहिल्यै थाहा थियो।’

प्रचण्डले प्रतिनिधिसभा विघटनमा सर्वोच्च अदालतले संविधानको मर्म र भावना अनुसारको फैसला गर्ने विश्वास समेत ब्यक्त गरेका छन्। ‘मलाई भरोसा छ, सम्मानित सर्वोच्च अदालतले देशको आवाज सुन्ने छ, सम्बिधानको भावना र अक्षरलाई सम्बोधन गर्नेछ। म कल्पना पनि गर्न सक्दिन कि अदालतले जनताको मर्म बुझ्दैन।’

संसद विघटनविरुद्ध निर्मम संघर्ष गर्नु परेपनि तयार रहेको भन्दै उनले भने, ‘भोलि नै अर्को चरणको कार्यक्रमको तयारी गर्दैछौं । यो भन्दा अलि कडा । प्रधानमन्त्री वा अरु भ्रममा नबस्नुहोला । सिधासिधा कुरा हो, हामी अन्तिम समयसम्म लड्छौं ।’

• Categories
• #राजनीति