कक्षा ११ को परीक्षाशुल्क विद्यार्थीलाई नै फिर्ता हुने

आगमनखबर संवाददाता

राष्ट्रिय परीक्षा बोर्डले कक्षा ११ का विद्यार्थीसंग २०७६ मा परीक्षा आवेदन फाराम भरी २०७७ मा संचालन हुने भनिएको परीक्षा शुल्क बापत लिइएको रकम रू ६०० मध्ये रू ४०० परीक्षार्थीलाई नै फिर्ता दिने भएको छ।

कक्षा ११ को परीक्षा सञ्चालन, व्यवस्थापन, मूल्याङ्कन, नतिजा प्रकाशन तथा प्रमाणीकरण कार्यविधि, २०७७ मा व्यवस्था भएअनुसार कक्षा ११ को वार्षिक परीक्षा सञ्चालन विद्यालयले नै गर्ने भएकोले २०७७ सालको कक्षा ११ को वार्षिक परीक्षामा सहभागी हुनका लागि परीक्षा शुल्क बोर्डमा बुझाइसकेका विद्यार्थीहरूको सम्बन्धमा विद्यार्थीहरूले सम्बन्धित विद्यालयमार्फत बोर्डमा बुझाएको परीक्षा शुल्क रु.६००।मध्ये परीक्षा सञ्चालन तयारीका क्रममा भएको खर्च वापत रु.२००। बाँकी रु.४०० नियमित परीक्षार्थीका हकमा आगामी वर्ष सञ्चालन हुने कक्षा १२ को वार्षिक परीक्षा शुल्कमा समायोजन गर्ने र आंशिक ग्रेड वृद्धि परीक्षार्थीहरूका हकमा बोर्डले सञ्चालन गर्ने वार्षिक परीक्षामा सहभागी हुने भएमा सोही परीक्षा शुल्कमा समायोजन गर्ने, परीक्षामा सहभागी हुन नपर्ने विद्यार्थीहरूका हकमा कक्षा १२ को प्रमाणपत्रको शुल्कमा समायोजन गर्ने निर्णय भएको ब्यहोरा अवगत गराउँदै बोर्डले सम्बन्धित सबैको जानकारीको लागि यो सूचना प्रकाशन गरेको हो ।