राजधानी जोड्ने मुख्य राजमार्ग अवरुद्ध – नारायणी नदीले खतराको विन्दु पार गर्दै

आगमनखबर संवाददाता

आइतवारदेखिको अविरल वर्षाका कारण देशभरको जनजीवन प्रभावित भएको छ । निरन्तरको वर्षापछिको बाढी र पहिरोले ठाउँ ठाउँमा राजमार्ग अवरुद्ध गरेका छ भने कतिपय ठाउँ डुबानमा परेका छन् ।

राजधानी काठमाडौं उपत्यका जोड्ने प्रमुख नाका पृथ्वी राजमार्ग सोमवार दिउँसोदेखि अवरुद्ध भएको छ । धादिङ र चितवनको सीमामा पर्ने मौवा खोलाको पुलमा बाढीले क्षती गरेपछि सोमवारदेखि राजमार्ग ठप्प छ ।

मौवाखोलामा धादिङ पट्टीको सडकमा समेत क्षती गरेको छ । राजमार्ग अवरुद्ध भएपछि काठमाडौं भित्रने सवारी साधन बिच बाटोमै रोकिएका छन ।

पृथ्वी राजमार्गको अन्य ठाउँमा पनि पहिरोले क्षती पुर्याएको जिल्ला प्रहरी कार्यालय धादिङले जनाएको छ । नारायणगढ मुग्लिङ सडकखण्डको विभिन्न स्थानमा पनि सडक अवरुद्ध भएको छ ।

धादिङका प्रमुख जिल्ला अधिकारी आस्मान तामाङले अवरुद्ध राजमार्ग दिउँसोसम्म एकतर्फी रुपमा संचालन गर्ने प्रयास भइरहेको बताएका छन् ।

सिद्धार्थ राजमार्गको बुटवल पाल्पा सडकखण्ड पनि अवरुद्ध भएको छ । अविरल वर्षापछिको काठमाडौं उपत्यकाका केही क्षेत्र डुबानमा परेका छन् । ललितपुरको इमाडोल, टीकाथली र गोदावरी खोला आसपासको क्षेत्रमा सोमवार दिउसो बाढी पसेको महानगरीय प्रहरी प्रभाव ललितपुरका एसएसपी टेकप्रसाद राईले जानकारी दिए ।

बाढीका कारण नारायणी नदीले सोमवार खतराको विन्दु पार गरेको थियो । जल तथा मौसम विज्ञान विभागले मंगलवार बिहानै सूचना जारी गर्दै चितवनको सौराहा क्षेत्रमा सावधानी अपनाउन आग्रह गरेको छ ।

• Categories
• #सम -सामयिक