नतिजा आउने गरी हामी काम गर्नेछौं : गृहमन्त्री

आगमनखबर संवाददाता

काठमाडौँ । उपप्रधान तथा गृहमन्त्री रवि लामिछानेले सम्बन्धित निकायले काम गरिरहेकाले गलत गरेका मान्छेहरु कोही पनि बाँकी नरहने बताएका छन् । 

सुरक्षाकर्मीको हत्या आरोपमा फरार रहेका सांसद लक्ष्मी महतो कोइरी निर्बाध संसद् आउजाउ गरिरहेको विषयमा सञ्चारकर्मीले सोधेको प्रश्नमा संघीय संसद्‌ भवनबाट बाहिरने क्रममा उपप्रधानमन्त्री लामिछानेले सो धारणा राखेका हुन् । 

गलत गरेको मान्छेहरुलाई तुरुन्त समात्न सक्ने मेकानिज्म कहीं न कहीं कमजोरी भएका कारण मानिसहरु लुकेका छन् । हराएका छन् । देखिएका छैनन्,’ उनले भने, ‘गलत गरेका मान्छेहरु कोही पनि बाँकी रहँदैनन् । होला, केही समय लुक्ने, भाग्ने, छल्ने, भेष बदल्ने । थाहा नपाउने भन्ने होला । प्रहरीले काम गरिरहेको छ । तपाईंहरुले थाहा पाउनुहुनेछ ।’

आफूले भर्खरै जिम्मेवारी सम्हालेको र राज्यका कयौं निकायहरुलाई निरीह बनाइएकोले नतिजा आउन समय लागेको उनले बताए । ‘राज्यका कयौं निकायहरुलाई निरीह बनाइएको छ । त्यसले गर्दा नतिजा आउन समय लाग्ने कुरा हो,’ उनले भने, ‘हेर्दै गर्नु होला नतिजा आउने गरी हामी काम गर्नेछौं । हामीले भर्खरै जिम्मेवारी सम्हालेका छौं । धेरै कामहरु गर्न बाँकी छन् ।

• Categories
• #मुख्य समाचार