सिन्धुलीमा सवारी दुर्घटना:एकको मृत्यु, दुई घाइते

आगमनखबर संवाददाता

सिन्धुलीमा भएको सवारी दुर्घटनामा एक जनाको मृत्यु भएको छ। दुर्घटनामा अरु दुई जना घाइते भएका छन्।

दुर्घटनामा मोटरसाइकलको पछाडि सवार सुनसरी जिल्ला, इटहरी घर भएका २६ वर्षीय यादव ढुङ्गानाको मृत्यु भएको जिल्ला प्रहरी कार्यालयले जनाएको छ।

जिल्ला प्रहरी कार्यालयका प्रहरी नायब उपरीक्षक श्यामबहादुर खत्रीका अनुसार यादवको दुर्घटनामा परी टाउकामा गहिरो चोट लागेको र थप उपचारका लागि सिरहाको फूलकुमारी अस्पताल कर्जनाहा अस्पतालमा लगिएकामा अस्पतालले मृत घोषणा गरेको हो। उनी लघु उद्योग वित्तीय संस्था दुधौली शाखाको शाखा प्रमुखका रुपमा कार्यरत रहेको जिल्ला प्रहरी कार्यालयले जनाएको छ।

यस्तै दुर्घटनामा मोटरसाइकल चालक बारा, निजगढ नगरपालिका –७  घर भएका २४ वर्षीय  अनिल घिमिरेको हात र खुट्टामा सामान्य चोट लागेको र  आवश्यक उपचारपछि प्रहरीको नियन्त्रणमा रहेको प्रहरी नायब उपरीक्षक खत्रीले जानकारी दिए। घिमिरे आरम्भ माइक्रो फाइनान्स दुधौलीमा कार्यरत रहेको बताइएको छ ।

दुर्घटनामा साइकल चालक सिन्धुलीको दुधौली नगरपालिका –७ सुगारे बस्ने २३ वर्षीय रासलाल अधिकारीको अगाडिका पाँच दाँत भाँच्चिएको तथा हात र खुट्टामा चोट लागेको जिल्ला प्रहरी कार्यालयले जनाएको छ ।

गएराति मदन भण्डारी राजमार्गमा कटारीबाट दुधौलीतर्फ आउँदै गरेको  लु ५८ प २६३८ अस्थायी नम्बरको मोटरसाइकल र विपरीत दिशाबाट आइरहेको साइकल सुगारेमा  ठक्कर खाई दुर्घटना भएको प्रहरीले जनाएको छ। रासस     

• Categories
• #दुर्घटना