पिसिआर मेसिनसहित स्वास्थ्यकर्मीको टोली दैलेखमा

आगमनखबर संवाददाता

पिसिआर मेसिनसहितको स्वास्थ्यकर्मीको टोली दैलेखमा पुगेको छ । संक्रमित निरन्तर बढ्दै गएपछि कोरोना परीक्षण गर्ने मेसिनसहितको स्वास्थ्यकर्मीको टोली दैलेख आएको हो ।

सांसद रविन्द्रराज शर्माको नेतृत्वमा काठमाडौंबाट गएको स्वास्थ्यकर्मीको टोली शुक्रबार दैलेख आइपुगेको छ । शर्माले निर्वाचित क्षेत्र विकास कोषअन्तर्गत बचेको एक करोड रकम मेसिन खरिद गर्न दिएका थिए । नारायण नगरपालिकामार्फत मेसिन खरिद गरिएको हो । मेसिनसँगै एक हजार थान भिटिएम (स्वाब राख्ने भाँडो) पनि ल्याइएको छ ।

स्वास्थ्यकर्मीको टोलीमा दैलेखमै जन्मिएका डा. रविन खड्कासहित आठजना छन् । टोलीमा ल्याब टेक्निसियन प्रमुखसहितका व्यक्तिहरू छन् । पिसिआर मेसिनको प्राविधिक एवं व्यवस्थापकीय जिम्मेवारी मध्यपश्चिम विश्वविद्यालयका उपकुलपति प्राडा नन्दबहादुर सिंहसहितको टोलीले गर्ने सांसद शर्माले जानकारी दिए । मेसिनबाट दैनिक तीन सयजनाको कोरोना परीक्षण हुनेछ । केही दिनभित्रै अर्को मेसिन पनि थपेर दैनिक तीन हजारजनाको कोरोना परीक्षण गर्ने सांसद शर्माको भनाइ छ ।

कर्णाली प्रदेश सभाका सदस्य अमरबहादुर थापाले तीन दिनभित्र मेसिन सञ्चालन र अस्पताल उद्घाटन हुने बताए । मेसिन जडान गर्ने भवन निर्माण अन्तिम तयारीमा छ । २–३ दिनभित्रै भवन निर्माण सम्पन्न हुने र थप एक दिनमा मेसिन जडान गरिसक्ने डा. रविन खड्काले जानकारी दिए । ‘म आफैँ मेसिन लिएर आएको छु, मेसिन जडान गरेर पिसिआर जाँचपश्चात् मात्रै काठमाडौं फर्कन्छु,’ डा. खड्काले भने ।

यसअघि दैलेखबाट स्वाब संकलन गरी सुर्खेत र जुम्ला पठाउनुपर्ने बाध्यता थिए । रिपाेर्ट आउन २० दिनसम्म कुर्नुपर्ने बाध्यता छ । नयाँ पत्रिकामा खबर छ।

• Categories
• #स्वास्थ