नेपालमा कोरोनाका कारण मृत्यु हुनेको संख्या २ सय ८९ पुग्यो

आगमनखबर संवाददाता

स्वास्थ्य तथा जनसंख्या मन्त्रालयले काठमाडौँ पछिल्लो २४ घण्टामा ९ जनाको कोरोनाका कारण निधन भएको जनाएको छ ।

आइतवार नियमित प्रेस ब्रिफिङमा बोल्दै मन्त्रालयका प्रवक्ता डा. जागेश्वर गौतमले पछिल्लो २४ घण्टामा ९ जनाको मृत्यु भएको बताएका हुन् ।

मृत्यु हुनेमा काठमाडौँका ७४, ६८ र ८५ वर्षीय तीन पुरुष, चितवनका ७० वर्षीय पुरुष, धनुषाका ३५, पर्साका ७७ र मोरङका ४५ वर्षीय पुरुष रहेका छन् भने मोरङकी ६४ र झापाकी ४५ वर्षीय २ महिला रहेका छन् ।

यससँगै नेपालमा कोरोनाका कारण मृत्यु हुनेको संख्या २ सय ८९ पुगेको छ ।

त्यस्तै मुलुकभर पछिल्लो २४ घण्टामा ९ सय ८० मा कोभिड १९ को संक्रमण भएको छ ।

डा. गौतमले १० हजार ३ सय ८२ पीसीआर परीक्षण गरिएको र त्यसमध्ये ९ सय ८० मा नयाँ संक्रमण देखिएको बताएका हुन् ।

यससँगै नेपालमा सक्रिय संक्रमितको संख्या १७ हजार २७ पुगेको छ ।

पछिल्लो २४ घण्टामा डिस्चार्ज हुनेको संख्या १८ सय १४ छ भने हालसम्म २८ हजार ९ सय ४१ संक्रमणमुक्त भएर डिस्चार्ज भएका छन् ।

यो संख्या ६३ प्रतिशत रहेको डा. गौतमले बताए ।

• Categories
• #मुख्य समाचार