इजरायलमा कोरोनाको रिपोर्ट सेकेन्डमै

अनु थापा

इजरायलको सबभन्दा ठूलो मेडिकल सेन्टरले कुनै व्यक्ति कोरोनाभाइरसबाट संक्रमण भए नभएको एक सेकेन्डभित्र पत्ता लगाउने परीक्षण थालेको बिहीवार जनाएको छ ।

परीक्षणका क्रममा मानिसहरूलाई नूनपानी दिएर कुल्ला गर्न लगाइयो अनि एउटा भाँडोमा थुक्न लगाइयो । त्यसपछि त्यसलाई सानो स्पेक्ट्रल डिभाइसले परीक्षण गरियो । थुकिएको पानीमा प्रकाश देखाएर कोभिड–१९ भए नभएको विश्लेषण गरिनेछ । 

समय बित्दै जाँदा यसले थप सही परिणाम दिने अपेक्षा गरिएको छ । 

 शेबा मेडिकल सेन्टरमा सेन्टर फर जियोग्राफिक मेडिसिन यान्ड ट्रपिकल डिजीजेजका एली स्वार्जले परीक्षणको नेतृत्व गरिरहेका छन् । उनले कोभिड–१९ पत्ता लगाउने पीसीआर स्वाबभन्दा यसलाई प्रयोग गर्न सजिलो हुने बताए ।

अहिलेसम्मको परीक्षणमा हामीले उत्साहजनक परिणाम पाएका छौं । यो बढी सहज र सस्तो छ,’ उनले भने । 

आरम्भिक क्लिनिकल ट्रायलमा सयौं रोगीहरूलाई समावेश गरिएको थियो र यो नयाँ डिभाइसले शरीरमा भाइरस रहे नरहेको कुरा ९५ प्रतिशत मिलाएको थियो । 

जेरुसेलमको हिब्रू विश्वविद्यालयमा मोलिक्युलर भाइरोलोजीका विज्ञ आमोस पानेले यस डिभाइसका विषयमा अन्तिम निर्णय लिनुअघि थप आँकडा र तुलना गर्नुपर्ने बताए ।

• Categories
• #देश–विदेश