मिर्गाैला पीडितको उपचारमा आठ लाख ६५ हजार सहयोग

आगमनखबर संवाददाता

कास्की। लामो समयदेखि दुवै मिर्गौलामा समस्या आएर उपचाररत मादी गाउँपालिका–७ का कृष्ण गुरुङलाई थप उपचारका लागि आर्थिक सहयोग उपलव्ध गराइएको छ ।

सोही वडाको थाक गाउँका चेली हाल हङकङ निवासी सामाजिक अभियानकर्मी नानी कमला गुरुङको पहलमा सङ्कलित रु आठ लाख ६५ हजार २८० पीडित परिवारलाई आज हस्तान्तरण गरिएको हो । शिक्षासेवी लक्ष्मी गुरुङ र अभियानकर्मी मनु गुरुङले सो रकम पीडित परिवारलाई हस्तान्तरण गर्नुभयो ।

‘कृष्ण गुरुङ बचाउ अभियान’ का कोषाध्यक्ष दुर्गाबहादुर गुरुङले बिरामीको मिर्गौला प्रत्यारोपणको प्रक्रिया सुरु भएको बताउनुभयो । कमजोर आर्थिक अवस्थाका कारण सहयोगी मनबाट स्वदेश तथा विदेशमा सहयोग रकम जुटाएर उपचारमा सहयोग गर्ने योजनाअनुसार हालसम्म रु १८ लाख सङ्कलन भएको उहाँले जानकारी दिनुभयो । सहयोग रकम हस्तान्तरण कार्यक्रममा सोही वडाका वडाध्यक्ष लालबहादुर गुरुङले विदेशमा रहे पनि दुःखका बेलामा सक्दो सहयोग गर्नेहरुप्रति आभार व्यक्त गर्नुभयो ।

सहयोग समितिका अध्यक्ष चन्द्रबहादुर गुरुङले सामाजिक अभियानकर्मीलगायतबाट सहयोग जुटाएर पीडितको उपचार भइरहेकाले बिरामीको जीवन बचाउन स्वेच्छिक सहयोग गर्न आग्रह गर्नुभयो । जनकल्याण तमु समाजका अध्यक्ष इन्द्रबहादुर गुरुङ, सल्लाहकार नन्दबहादुर गुरुङ, अभियानका सचिव बालकृष्ण गुरुङलगायतले सहयोग दाताप्रति आभार व्यक्त गर्नुभयो ।

• Categories
• #मुख्य समाचार
• #स्वास्थ