कोरोना नियन्त्रण गर्न प्रदेश सरकारद्वारा स्थानीय तहलाई एक करोड निकासा

आगमनखबर संवाददाता

विराटनगर -प्रदेश १ सरकारले कोरोना रोकथाम, नियन्त्रण र उपचारको व्यवस्था मिलाउनका स्थानीय पालिकालाई थप एक करोड १० लाख उपलब्ध गराएको छ।

प्रदेश सरकारले स्थापना गरेको कोरोना जनसुरक्षा कोषबाट आइसोलेशन केन्द्र स्थापना तथा सञ्चालनका लागि स्थानीय पालिका, जिल्ला अस्पताल, प्रशासनलगायतलाई आवश्यक रकम पठाइएको हो। 

मोरङ्गका सुनवर्षी र  रतुवामाई नगरपालिकालाई १०÷१० लाख तथा धनपालथान, जहदा र कटहरी गाउँपालिकालाई ५-५ लाखका दरले आइसोलेशन केन्द्र स्थापना र सञ्चालनका लागि रकम पठाइएको छ। त्यस्तै चौदण्डीगढी नगरपालिकालाई १० लाख तथा गौरीगञ्ज र कमल गाउँपालिकालाई  ५÷५ लाख प्रदेश सरकारले पठाएको छ। 

यसैगरी इलाम अस्पताललाई १० लाख, उदयपुर अस्पताललाई १५ लाख र  झुम्का कारागारलाई १० लाख पठाइएको छ। सुनसरी जिल्लाका क्वारेन्टिन, आइसोलेशन र होल्डिङ सेन्टर व्यवस्थापनका लागि जिल्ला प्रशासन कार्यालय सुनसरीलाई १० लाख र प्रदेश प्रहरी कार्यालय परिसरभित्रको आइसोलेशन व्यवस्थापनका लागि प्रदेश प्रहरी कार्यालयलाई १० लाख प्रदेश सरकारले कोरोना जनसुरक्षा कोषबाट उपलब्ध गराएको हो। 

• Categories
• #अर्थतन्त्र