डिजाइन कमजोर हुदाँ ७ करोड ८८ लाख रुपैयाँमा निर्माण ड्याम बगायो

आगमनखबर संवाददाता

भारी वर्षासँगै आएको बाढीले पोखरा फेवातालको मुहानमा निर्मित्त चेक ड्याम बगाएको छ । घाँटीछिनास्थित हर्पणखोलामा निर्माण गरिएका २ वटा चेक ड्यामको निर्माण कार्य भर्खरै मात्र सम्पन्न भएको थियो ।

जसमध्ये एउटा ड्याम बाढीले बगाएको हो । हर्पणखोलाको पानीको बहाव बढेपछि उक्त ड्याम बगाएको पोखरा महानगका इन्जिनियर विमल आचार्यले बताए ।

‘३४ मिटर लम्बाइमा ३ लेयर (तह) मा चेक ड्याम बनाइएको थियो,’ आर्चायले भने, ‘जसमध्ये माथिल्लो ड्यामको १० मिटर बगाएको छ । निर्माण कार्य सम्पन्न भएर हस्तान्तरण गर्ने तयारीमा थियौ ।’ उक्त योजनाको अन्तिम बिल भुक्तानीको काम बाँकी रहेको उनले बताए ।

गण्डकी प्रदेश सरकार र पोखरा महानगरपालिकाको संयुक्त लगानीमा फेवाताल संरक्षणको लागि हर्पनखोला, अँधेरीखोला, लौरुकखोला र बेतनीखोलामा ४ वटा ड्याम निर्माण गरिएको ड्याममध्येको यो एक हो ।

माथिबाट पहिरो जाने र पानीको बहाब बढेपछि भत्किएको ड्यामका कारण डुडेफाँटको बस्ती जोखिममा रहेको स्थानीयले बताएका छन् । खोलाले उत्तरतर्फको ड्याम नै बगाएपछि बस्तीमा खोलो पस्ने त्रास स्थानीयमा बढेको छ । ‘न्यून गुणस्तरीय भएको भए सो ड्याम पुरै बगाउने थियो र अन्य ड्याम पनि बगाउने थियो,’ इन्जिनियर आचार्यले भने ।

एकजना प्राविधिका अनुसार ड्याम साह्रै कमजोर थियो । उनले भने,’गुणस्तर भन्ने कुरा दोस्रो कुरा हो । पहिलो चरणमा ड्यामको डिजाइन कस्तो छ भन्ने हो ? ठाडो खोलामा वेगले बग्ने पानीमा बनाइएको यो ड्यामको डिजाइन नै कमजोर थियो । यो ड्याम निर्माण गर्ने क्रममा नै मलाई भत्किन्छ भन्ने लागेको थियो । अन्य बाँकी ड्याम पनि भत्किन्छन् ।’

अहिलेको वर्षातमा नभएपनि अर्को वर्षातमा भत्किने उनले दाबी गरे । ‘कमजोर डिजाइनले बनाइएका संरचना टिक्दैनन,’ उनले थपे, ‘साधारण किसिमको डिजाइनमा ड्याम निर्माण छ । माथिकै ड्याम भत्किएपछि ढुँगा, गेग्रेन तलै बगाएर ल्याउँछ र ड्याम भत्काउँछ ।’ सामान्य डिजाइनको ड्याम ठाडो खोलामा टिकाउने नहुने उनले बताए । सो ड्याम ७ करोड ८८ लाख रुपैयाँमा निर्माण गरिएको थियो ।

• Categories
• #अर्थतन्त्र