भाइरस रिमुभिङ कार्डको भ्रममा नपर्न स्वास्थ मन्त्रालयको अनुरोध

भुपराज अर्याल

शनिबार ,नेपालमा कोरोना भाइरस संक्रमितको संख्या १२,३०९ पुगेको छ। नेपालका सतहत्तरै जिल्लामा यसको प्रवेश भएको छ।आज मात्र ५५४ जना नयाँ संक्रमित थपिएका छन्।

स्वास्थ्य तथा जनसंख्या मन्त्रालयका प्रवक्ता जागेश्वर गौतमका अनुसार आज कैलालीका एक जना ५० वर्षीय पुरूषको मृत्यु भएसंगै कोरोनाबाट मृत्यु हुनेको संख्या २८ पुगेको छ।

गौतमले स्वास्थ तथा जनसंख्या मन्त्रालयको नियमित कोभिड १९ ब्रीफिङका क्रममा कोरोनाको संक्रमणसंगै विभिन्न भ्रम फैल्याई जनतालाई अनावश्यक दु:ख दिने र अनुचित फाइदा उठाउने प्रवृती हावी हुँदै गएको र त्यस्ता घटनाप्रति स्वास्थ मन्त्रालयको गम्भीर ध्यानाकर्षण भएको बताए ।

यसै क्रममा हालै भाइरस रिमुभिङ कार्डका नाममा सृजित भ्रममा नपर्न समेत उनले अनुरोध गरेका छन् ।यस्तो कार्ड हालसम्म पत्ता नै नलागेको जानकारी गराउँदै अपठ्यारो परिस्थितिको मौका छोपी आफ्ना लागि अवसर खोज्नेको भ्रममा समाजका प्रतिष्ठित ब्यक्तिहरु समेत परी कार्ड भिर्नु दुखद् घटना भएको कुरा बताए।

यसको प्रयोगबाट मानिसको मुटु ,कलेजो जस्ता संवेदनशील अंगमा समेत असर पर्न सक्ने हुँदा कुनै पनि हल्लाको पछि नलाग्न अनुरोध गर्दै कोरोनासंग लड्न कुनै पनि प्रकारको विधि पत्ता लागेमा स्वास्थ मन्त्रालयमा दर्ता गरी जनता समक्ष जानकारी गराइने कुरा समेत अवगत गराए।

• Categories
• #स्वास्थ