दाहसंस्कारपछि कोरोना पुष्टि , मलामी सबै त्रासमा

आगमनखबर संवाददाता

कास्की भदौ,२७ गते ।पोखराको फिस्टेल हस्पिटल एण्ड रिसर्च सेन्टरमा उपचारका क्रममा मृत्यु भएकी महिलाको दाहसंस्कारपछि कोरोना पुष्टि भएको छ ।

उनको अन्त्येष्टिमा मलामी गएका झण्डै २०० व्यक्तिहरु क्वारेन्टीनमा बस्नुपर्ने भएको छ । 

कास्कीको माछापुच्छ्रे गाउँपालिका–३ घर भइ हाल पोखरा–५ निवासी ४५ वर्षीया ती महिलाको भदौ २६ गते राति १ बजे मृत्यु भएको थियो । 

रक्त क्यान्सरबाट पीडित ती महिलालाई ३ दिनदेखि अस्पतालको आईसीयूमा राखेर उपचार हुँदै आएकोमा शुक्रवार मृत्यु भएपछि अस्पतालले कोरोना रिपोर्ट नआउँदै आफन्तलाई शव बुझाएको थियो ।

मृतकका आफन्तका अनुसार अस्पतालले कोरोना नभई अन्य कारणले ज्यान गएको भनी दाहसंस्कार गर्न सकिने भनेपछि शव बुझेर शुक्रवार नै पोखराको सेती नदी किनार रामघाटमा अन्त्येष्टि गरिएको थियो ।

अन्त्येष्टिमा सहभागी मलामीहरू आफन्तबाहेक पर्यटन व्यवसायी, गण्डकी प्रदेश सांसद, जनप्रतिनिधि, पत्रकार, शुभचिन्तक लगायत झण्डै २०० जनाको संख्यामा उपस्थित थिए ।

हालसम्म गण्डकी प्रदेशका २४ जनाले ज्यान गुमाएका छन् । 

• Categories
• #मुख्य समाचार