शुक्रबार बिहान ४ बजेदेखि राति १० बजेसम्म ललितपुर जिल्लामा कर्फ्यु

आगमनखबर संवाददाता

जिल्ला प्रशासन कार्यालय ललितपुरले भोलि शुक्रबारका लागि ललितपुरमा कर्फ्यु आदेश जारी गरेको छ।

सहायक प्रमुख जिल्ला अधिकारी ललितकुमार बस्नेतका अनुसार शुक्रबार बिहान ४ बजेदेखि राति १० बजेसम्म  जिल्लामा पर्ने चक्रपथ भित्रका सबै क्षेत्रमा कर्फ्यु लागू हुनेछ।

बिहीबार दिउँसो पुल्चोकमा रातो मच्छिन्द्रनाथको रथयात्राका क्रममा स्थानीय र प्रहरीबीच झडप भएको थियो।

ललितपुरका प्रमुख जिल्ला अधिकारी नारायणप्रसाद भट्टद्वारा जारी आदेशमा शान्ति सुरक्षा भंग हुनसक्ने देखिएको ललितपुरको बल्खुदेखि मनहरा पुलसम्मको चक्रपथभित्रमा शुक्रबार बिहान ४ बजेदेखि राति १० बजेसम्म कर्फ्यु जारी गरिएको हो।

कर्फ्यु आदेश जारी भएको स्थानमा आवतजावत, भेला र जुलुसमा प्रतिबन्ध गरिएको प्रशासनले जनाएको छ।

यो आदेशको उल्लंघन गरी घरबाट बाहिर निस्केमा वा अन्य काम गरेमा सुरक्षा अधिकारीले गोली समेत हान्न सक्नेछ,’ जारी सूचनामा भनिएको छ, ‘निषेधित गरिएको क्षेत्रमा घरबाट बाहिर ननिस्कन सर्वसाधारणलाई सूचित गरिन्छ।

• Categories
• #मुख्य समाचार