राष्ट्रकवि घिमिरेको अन्तिम संस्कार १० बजे पशुपति आर्यघाटमा गरिने

आगमनखबर संवाददाता

राष्ट्रकवि माधवप्रसाद घिमिरेको बुधवार बिहान १० बजे पशुपति आर्यघाटमा अन्तिम संस्कार गरिने भएको छ ।

यतिबेला राष्ट्रकवि निवास लैनचौरमा आफन्त र शुभेच्छुक जम्मा भएका छन् । घिमिरेको १०१ वर्षको उमेरमा मंगलवार साँझ आफ्नै निवासमा निधन भएको हो । उनी गत असोजमा १०१ वर्ष पूरा भएर १०२ वर्ष लागेका थिए ।

विक्रम संवत् १९७६ असोज ७ गते लम्जुङको पुस्तुन बाहुनडाँडामा जन्मिएका राष्ट्रकवि घिमिरे नेपाली जनजीवनमा लोकप्रिय कवि हुन् । राष्ट्रकविको जन्मोत्सवको पूर्वसन्ध्यामा ‘राष्ट्रकवि एक सय एक कविको आँखामा’को लोकार्पण गरिएको थियो ।

राष्ट्रकवि घिमिरको १०१ औं जन्मोत्सवको अवसरमा एक सय एक कविद्वारा उनको व्यक्तित्व र कृतित्वका बारेमा लेखिएको कविता संग्रहको नेपाल–प्रज्ञा प्रतिष्ठानका कुलपति गंगाप्रसाद उप्रेतिले लोकार्पण गरेका थिए ।

• Categories
• #मुख्य समाचार