लागूऔषध खोज्दै मध्यरात जिल्ला अदालत तोडफोड

आगमनखबर संवाददाता

पोखरा । कास्की जिल्ला अदालतमा नकवजनी चोरीमा संलग्न रहेको अभियोगमा प्रहरीले एक जनालाई २४ घण्टा नबित्दै पक्राउ गरेको छ । पक्राउ पर्नेमा पोखरा १५, टुटुंगाका २७ वर्षीय अर्जुन परियार (दावा) रहका छन् । सामान्य लेखपढ मात्र गर्न जान्ने परियारमाथि भने शृंखलाबद्ध आपराधिक क्रियाकलापको फेहरिस्त छ ।

जिल्ला प्रहरी कार्यालय कास्कीले बिहीबार पत्रकार सम्मेलनमा उनलाई सार्वजनिक गरेको हो । लागूऔषधको कुलतमा फसेका परियारले यसअघिका मुद्दामा अदालतमा म्याद थप गर्न लगिदा मुचुल्का गरी नष्ट गर्न राखिएका लागूऔषध देखेका थिए । उनले लागूऔषध पाउने आशमा संवेदनशील क्षेत्र अदालतको ढोका मध्यरातमा फोडेरै महत्वपूर्ण मिसिल छरपस्ट पारेको कास्की प्रहरी प्रवक्ता प्रहरी नायब उपरीक्षक सुन्दर तिवारीले भिडियो क्लिप देखाउँदै बताए ।

घटना थाहा पाएपछि अभियुक्त नजिक पुग्न समय धेरै नलागेको डीएसपी तिवारीले बताए । प्रारम्भिक अनुसन्धानमा परियारले आफू संलग्न रहेको स्वीकारेको प्रहरीले जनायो ।

प्रहरी रेकर्डमा परियारले २०७३ देखि हालसम्म गरी विभिन्न नौ मुद्दा खेपेका छन् । २०७३ सालमा उनले तीनवटा चोरी मुद्दा, २०७४ सालमा लागूऔषध र भद्र व्यवहार, २०७५ मा लागूऔषध, २०७६ मा अभद्र व्यवहार र लागूऔषध मुद्दा खेपेर रिहा भएका थिए ।

मंगलबार राति वडा प्रहरी कार्यालय बैदाम अगाडि रहेको कास्की जिल्ला अदालतका इजलास नम्बर १ को कोठाको ढोकामा लगाएको ताला फोडेको, इजलासभित्रको काठको टेबुलमाथि इन्डेक्स फाइल यत्रतत्र छरिएको, इजलास नम्बर ६ को मूलढोकामा लगाएको ताला फोडिएको, कोठाभित्रको काठको टेबुलको तलको घर्रा खुला रही कागजात यत्रतत्र छरिएको थियो । साथै बांगिएको अवस्थामा फलामको रड प्रहरीले बरामद गरेको थियो ।

डीएसपी तिवारीले सो घटनामा संलग्न रहेको अभियोगमा परियारविरुद्ध नकवजनी चोरी मुद्दामा अनुसन्धान जारी रहेको जनाए । कानुनमा सरकारी स्वामित्व वा नियन्त्रणमा रहेको संगठित संस्था, सर्वसाधारण वा कुनै व्यक्तिलाई हानिनोक्सानी वा क्षति पु¥याउने नियतले जानीजानी वा विश्वास गर्नुपर्ने मनासिव कारण भई वा लापरबाही वा हेलचक्राइँ गरी कुनै निजी सम्पत्ति नास गरेमा वा त्यसको मूल्य, महत्व वा उपयोगिता घट्ने काम गरेमा अनाधिकृत प्रवेश तथा आपराधिक उपद्रवसम्बन्धी मुद्दा चलाउने सक्ने प्रावधान छ । राजधानी दैनिकमा खबर छ ।

• Categories
• #अपराध