तपाईं यो पोष्ट साझा गर्न सक्नुहुन्छ!

आगमनखबर संवाददाता

जनकपुर ।डेढ वर्षअघि ‘पृथकतावादी’ गतिविधि त्यागेर राजनीतिको मूल प्रवाहमा आएको घोषणा गरेका सीके राउत नेतृत्वको जनमत पार्टीका कार्यकर्ताले बिहीबार जनकपुरस्थित खानेपानी तथा ढल व्यवस्थापन कार्यालयका प्रमुख राजेश कुशवाहालाई नियन्त्रणमा लिएर लछारपछार गरेका छन् । जनकपुर–८ स्थित बलवामा खनिएको ढलको खाल्डो नपुरेको भन्दै उनीहरूले कुशवाहालाई दुर्व्यवहार गरेका हुन् । 

प्रत्यक्षदर्शीका अनुसार लाठी–भाटा बोकेका राउत समर्थक करिब २ सय कार्यकर्ताले कुशवाहालाई उनकै कार्यकक्षबाट लगेका थिए । कुशवाहालाई दुर्व्यवहार गर्दै उनीहरूले करिब १ घण्टा जनकपुर घुमाए । कुशवाहाले लगाएको टिसर्टसमेत च्यातेर उनीहरूले जीउभरि हिलो पोतिदिएका थिए ।

कुशवाहा बिहीबार समयमै कार्यालय पुगेका थिए । उनी सहकर्मीसित छलफल गरिरहेकै बेला चर्को नाराबाजी गर्दै राउत समर्थक पिराडी चोकस्थित खानेपानी कार्यालयमा पुगे । कार्यालय परिसरमा रहेका गाडीमा भाटा बजार्दै कार्यालय प्रवेश गरेका उनीहरूले कम्प्युटर, टेबल, फोटोकपी मेसिन, पंखालगायत समान तोडफोड गरे । ‘अचानक ठूलो भीड आउँदा हामी आत्तियौं,’ कार्यालयमा एक कर्मचारीले भने, ‘कार्यालय प्रमुखज्यूले प्रहरीलाई फोन गर्न थाल्नुभयो । उनीहरू उहाँकै कार्यकक्षमा पुगेर लछारपछार गरे । पछि सँगै लिएर गए ।’

राउत समर्थकले कुशवाहालाई जनकपुर घुमाइरहँदा सुरुमा प्रहरी मूकदर्शक बनेको थियो । पछि ठूलो संख्यामा प्रहरी परिचालन गरिए पनि कुशवाहालाई उनीहरूको ‘कब्जा’ बाट छुटाउन सकेनन् । धनुषा प्रहरीका अनुसार कुशवाहालाई छुटाउने क्रममा राउत समर्थकले प्रहार गरेको भाटा लागेर प्रहरी निरीक्षक विजय यादव घाइते भएका छन् । सञ्चारकर्मी पुगेपछि केही नरम देखिएका राउत समर्थकले कुशवाहामाथि दुर्व्यवहार गर्न भने रोकेनन् । 

मलाई गोली ठोके पनि केही बोल्दिनँ,’ सञ्चारकर्मीमाझ बोल्न राउत समर्थकले दबाब दिएपछि कुशवाहाले रुँदै यतिमात्रै बोले । झन्डै १ घण्टापछि जनकपुरधाम उपमहानगरपालिकाको कार्यालयनजिकबाट प्रहरीले कुशवाहालाई छुटाएर उपमहानगरको कार्यालयमा लगेका थिए । धनुषा प्रहरी प्रवक्ता डीएसपी जितेन्द्र बस्नेतले दुर्व्यवहार गर्ने १० जना राउत समर्थकलाई पक्राउ गरिएको जानकारी दिए ।

‘बलवा एरियामा खनिएको ढलको खाल्डो नपुरेपछि ढल व्यवस्थापन कार्यालयमा तोडफोड गरिएको हो,’ धनुषा प्रहरीको बुलेटिनमा भनिएको छ, ‘त्यो एरियामा राउतको पनि बसोबास छ ।’

प्रहरीका अनुसार राउत समर्थकले खानेपानी तथा ढल व्यवस्थापन कार्यालयको परिसरमा रहेका २ मोटरसाइकल, ३ कम्प्युटर, झ्यालका सिसा, फोटोकपी मेसिन, पंखा, वाटर फिल्टर र गमला तोडफोड गरेका छन् । जनमत पार्टीले जनकपुर सहरलाई व्यवस्थित, ढल निकासको उचित प्रबन्ध, फोहोर व्यवस्थापनलगायत माग गर्दै साताअघि खानेपानी तथा ढल निकास कार्यालय, जनकपुरधाम उपमहानगरपालिकाको कार्यालयलगायत सरकारी निकायमा ज्ञापनपत्र बुझाएको थियो ।

यसैबीच, धनुषाका प्रमुख जिल्ला अधिकारी बन्धुप्रसाद बाँस्तोलाले कुशवाहामाथि दुर्व्यवहार गर्नेविरुद्ध अनुसन्धानपछि मुद्दा चलाइने बताएका छन् । दोषीविरुद्ध अभद्र व्यवहार र सार्वजनिक शान्तिविरुद्धको कसुरमध्ये प्रमाणित हुने मुद्दा चलाइने उनको भनाइ छ । ‘यो लेभलको अमानवीय व्यवहार गरेकालाई त्यत्तिकै छोड्न मिल्दैन । 

अभद्र व्यवहारमा १ वर्ष कैद वा १० हजारसम्म जरिवाना र शान्तिविरुद्धको कसुरमा १ वर्ष कैदसँगै क्षतिपुर्तिसमेत भराउनुपर्ने हुन्छ,’ उनले भने । जनमत पार्टीका अध्यक्ष राउतले भने जनताले आजित भएर कारबाही गरेको जिकिर गरेका छन् । ‘खाल्डो पुर्न बलवा टोलका ६४ परिवारले मिलेर पटकपटक ज्ञापनपत्र बुझाएका थिए । 

कार्यालय, ठेकेदार कसैले सुनेनन्,’ उनले भने, ‘एम्बुलेन्स पास हुने अवस्था पनि छैन । असार पहिलो सातामै खाल्डो खनेकाले बच्चाहरू स्कुल जाने अवस्था छैन ।कान्तिपुर दैनिकमा खबर छ ।

सम्बन्धित पोष्टहरू
पत्रपत्रिका

एनआरएनए नेतृत्वको जिम्मेवारी महेशकुमार श्रेष्ठ

काठमाडौं । वैदेशिक रोजगारीमा जान नेपालीको नियती र बाध्यता दुवै हो। रोजगारी बन्दै गएको छ। २०४२ सालमा वैदेशिक रोजगारसम्बन्धी ऐनको व्यवस्था भएपछि बिदेसिनेको सङ्ख्या बढ्दै …

इजरायलबाट २५० जना नेपाली विद्यार्थीहरु आज नेपाल फर्किदै

काठमाडौ । इजरायलबाट २५० जना नेपाली विद्यार्थीहरु आज नेपाल आउदै छन। इजरायलस्थित तेलअभीभ विमानस्थलमा रहेका नेपाली विद्यार्थीहरू नेपाल आउनका लागि विमान चढिसकेका छन् । उनीहरुलाई …

यूक्रेन युद्ध: सरदर ‘हरेक सेकेन्ड’ मा एक नाबालक शरणार्थी बन्दै

एजेन्सी ।यूक्रेनमा प्रति सेकेन्ड झन्डै एक बच्चा युद्धको कारण शरणार्थी बन्न थालेको संयुक्त राष्ट्र मानवीय संघसंगठनहरूले बुधबार जानकारी गराएका छन् ।  रूसी आक्रमण सुरु भएदेखि …

रानीमहल र श्रीनगरमा पनि बतास : स्वार्थ नमिल्दा पछि हट्यो

बतासले रेस्टुरेन्टलगायतका संरचना बजारनजिक र डाँडाको खाली भागमा बनाउन माग गरेको थियो पाल्पा । तानसेनको श्रीनगरडाँडा र रानीमहल क्षेत्र सञ्चालन तथा व्यवस्थापनबाट बतास समूह पछि …