कांग्रेसको वडा अधिवेशनमा पौडेल समूह असन्तुष्ट

आगमनखबर संवाददाता

काठमाडौँ । नेपाली कांग्रेसका वरिष्ठ नेता रामचन्द्र पौडेल समूहले वडा अधिवेशनमा असन्तुष्ट जनाएको छ । 

पौडेल समूहले कांग्रेस सभापति एवं प्रधानमन्त्री शेरबहादुर देउवाको गृहजिल्ला डडेल्धुराको वडा अधिवेशनका सन्दर्भमा निर्वाचन समितिसमक्ष असहमति समेत राखेको छ । 

बिहीबार पौडेल समूहका नेताहरुले सानेपास्थित केन्द्रीय कार्यालयमा निर्वाचन समितिलाई भेटेर डडेल्धुरामा दुई तिहाईले बहिष्कार गरेको अवस्थामा कसरी वडा अधिवेशन भयो ? भनेर प्रश्न गरेका हुन् ।

हामीले डडेल्धुरासहितका जिल्लाका विषयमा आफ्ना असहमतिका कुराहरु राखेका छौँ । हाम्रोतर्फबाट रामचन्द्र पौडेलले कुरा राख्नुभयो,’ समितिसँगको बैठकपछि नेता शेखर कोइरालाले भने, ‘७५ वर्षे कांग्रेसको इतिहासमा प्रहरी प्रशासनको बलमा कहिल्यै पनि र काहीँ पनि अधिवेशन भएको छैन । सभापतिकै जिल्लामा यस्तो हुने कुरा दुर्भाग्यपूर्ण हो ।’ कोइरालाका अनुसार निर्वाचन समितिले डडेल्धुरामा खटिएका निर्वाचन अधिकृतलाई बोलाएर आवश्यक जानकारी लिने र निर्णय गर्ने जनाएको छ ।

पौडेलले भने राज्यशक्तिको दुरुपयोग गरेर बलको भरमा चुनाव गराइएको छ, त्यो हामी मान्दैनौँ । हामीले निर्वाचन समितिलाई त्यही भनेका छौँ,’ डडेल्धुराको वडा अधिवेशन पुन: गराउनुपर्छ । 

पौडेल समूहले २५ भदौमा डडेल्धुरामा भएको वडा अधिवेशन बहिष्कार गर्दै पुन: अधिवेशन गराउन माग गर्दै आएको छ ।

• Categories
• #कांग्रेसको १४ औ महाधिवेशन