टेलिफोन टावरको लागि रु ५५ लाख बजेट

आगमनखबर संवाददाता

किमाथाङ्का। सङ्खुवासभाको दुर्गम उत्तरी क्षेत्र भोटखोला गाउँपालिकाले टेलिफोन टावरका निर्माणका लागि रु ५५ लाख विनियोजन गरेको छ । भोटखोलाले टेलिफोन टावरसम्म विद्युत् विस्तार गर्ने रु ५५ लाख बजेट विनियोजन गरिएको गाउँपालिका अध्यक्ष तेम्बा भोटे जानकारी दिनुभयो ।

विद्युत् सेवा नपुगेका दुर्गम भोटखोलामा राखिएका बिटिएस टावरमा सोलारपावर जडान गरिएको छ । बिटिएस टावर सोलर पावरको भरमा मात्रै चल्ने गरेका छन् । सोलारपावर जडान गरिएको भोटखोलाको टावर घाम नलाग्दा बेला बेला टेलिफोन सेवाअवरुद्ध हुने गरेको छ । बिटिएस टावरसम्म विद्युत् विस्तार गर्ने चालु आर्थिक वर्षमा रु ५५ लाख विनियोजन गरेको गाउँपालिका अध्यक्ष भोटेले बताउनुभयो ।

विद्युत् विस्तार नहुँदा नेपाल टेलिकमका मोबाइल प्रयोग गर्ने भोटखोलाका नागरिकले मौसमको भरमा सेवा पाउने गरेका छन् । भोटखोला–२ मा रहेको माक्पालुङमा जडान टावरमा सोलारले काम नगरेपछि दुर्गम भोटखोलामा मोबाइलमा सम्पर्क बिच्छेद भइरहने मुख्य समस्या छ । भोटखोलामा सिडिएमए स्काइको रिममार्फत मोबाइल फोन सञ्चालनमा छ ।

उक्त विनियोजित बजेटमा गाउँपालिकाबाट रु २५ लाख वडा नम्बर २ बाट रु २५ लाख र वडा नम्बर ४ बाट रु पाँच लाख गरी ५५ लाख बजेट विनियोजन भएको अध्यक्ष भोटेले बताउनुभयो । गाउँपालिकाले विनियोजन गरिएको सो बजेटले चेपुवामा रहेको विद्युत्लाई माक्पालुङ डाँडाको टावरसम्म लगिने पोल तारलगायतमा खर्च गरिने उहाँको भनाइ छ । सोलारपावरले काम नगरेपछि चेपुवाको विद्युत् टावर लग्ने तयारी भएको बताउनुभयो । माक्पालुङमा विद्युत् पुगेपछि भोटखोलाको हटिया, च्याम्ताङ, चेपुवा, लिङ्गम, छुम्सुर, रिदाकलगायत दर्जनौँ गाउँका बासिन्दा टेलिफोन सेवाबाट लाभान्वित हुने छन् । रासस

• Categories
• #प्रविधि