मानवीय संवेदनशीलताको भूमिका निर्वाह गर !

अनिल शर्मा पौडेल

काठमाडौँ । वर्तमान परिस्थितिमा बढ्दो सङ्क्रमणका कारण  विभिन्न अस्पतालले अक्सिजन अभावको कारण देखाई बिरामीलाई अस्पतालमा भर्ना गर्न नसकिने तथा भर्ना भएका बिरामीलाई समेत उपचार गर्न नसकिने भन्दै सार्वजनिक सूचना जारी गरिरहेको छ । 

सङ्क्रमण नियन्त्रणका लागि अस्पताल, औषधि तथा अक्सिजनको व्यवस्थापन गर्नुपर्ने समयमा सरकार नागरिकको अवस्थाप्रति एकरति पनि जिम्मेबारी नभई सत्ता बचाउन क्रियाशील भइरहेको छ ।

अक्सिजनको अभावलाई पूर्ति गर्न सबै पक्षबाट भइरहेको प्रयासलाई नजरअन्दाज गर्दै अक्सिजन अभावको कारण देखाई बिरामीलाई अस्पतालमा भर्ना गर्न नसकिने तथा भर्ना भएका बिरामीलाई समेत उपचार गर्न नसकिने भन्दै सार्वजनिक सूचनाका नाममा सर्वसाधारण जनतामा त्रास फैलाउने कार्य अस्पतालहरुले गर्दै आईरहेका छन ।

अस्पतालले गरेको यस्ता गतिविधिले आम नागरिकमा समेत असर पर्ने हुँदा यस्तो संवेदनशील अवस्थामा सबै पक्ष जिमेवार भई कोभिड–१९ सङ्क्रमण नियन्त्रणमा प्रभावकारी भूमिका निर्वाह गर्नुपर्नेमा जिम्मेबार ब्यक्तिहरु कमिशनको खेलमा लागेका छन ।

खाडी मुलुकमा रगत पसिना बगाएका  हाम्रा नेपाली दाजु भाईहरुले पठाएको रेमिटान्स र हामीले तिरेको करको दुरुपयोग हुँदा समेत नागरिक सचेत नहुनु यो बिडम्बना हो । तीनै खाडी मुलुकमा रहेका नेपालीहरुको समन्वयमा आज अक्सिजन सिलिन्डर नेपाल आउने भएको छ । 

कोभिड–१९ बाट नागरिकको जीवन रक्षाका लागि तत्काल प्रभावकारी ढङ्गले काम गर्न सरकारका नाममा सर्वोच्च अदालतले अन्तरिम आदेश जारी गरे पनि अदालतको आदेश अनुसार सरकार लागेको देखिदैन ।

नागरिकको जीवनसँग प्रत्यक्ष चासो राख्ने सरोकार पक्षको प्रतिनिधित्वसमेत हुने गरी एउटा कार्यसमितिको निर्माण गरी समस्या समाधान प्रभावकारी ढङ्गले गर सरकार ।

• Categories
• #सम्पादकीय