औषधि विभाग फार्मेसी अधिकृत सुवेदीविरुद्ध भ्रष्टाचार मुद्दा

आगमनखबर संवाददाता

काठमाडौं । अख्तियार दुरुपयोग अनुसन्धान आयोगले औषधि विभाग शाखा कार्यालय विराटनगरका फार्मेसी अधिकृत सरोज सुवेदीविरुद्ध भ्रष्टाचार मुद्दा दायर गरेको छ । सुवेदीले फार्मेसी पसल खोलिदिने प्रयोजनका लागि सेवाग्राहीसँग २ लाख रुपैयाँ घुस लिएको अभियोगमा आयोगले विशेष अदालतमा मुद्दा दायर गरेको हो ।

आयोगको अनुसन्धानमा अधिकृत सुवेदीले सेवाग्राहीविरुद्धको मुद्दामा जिल्ला सरकारी वकिल कार्यालय, तेह्रथुमबाट औषधि व्यवस्था विभाग, शाखा कार्यालय, विराटनगरमा पठाएको इलाजसम्बन्धी मुद्दामा राय पठाउने र सेवाग्राहीको सिलबन्दी भएको फार्मेसी खोली मुद्दा मिलाउने प्रयोजनका लागि २ लाख रुपैयाँ घुस लिएको प्रमाणित भएको भन्दै मुद्दा दायर गरेको आयोगको अभियोगपत्रमा उल्लेख छ । सुवेदीलाई २ लाख बिगो बराबरको रकम कायम हुनेगरी भ्रष्टाचार निवारण ऐन, २०५९ को दफा ३ को उपदफा (१) बमोजिम मुद्दा दायर गरेको छ ।

यस्तै, सेवाग्राहीको फर्निचर उद्योग सञ्चालनमा सहजीकरण गरिदिने भन्दै सशस्त्र प्रहरी निरीक्षक दधिराम पौडेल र सशस्त्र प्रहरी नायब निरीक्षक राजेश पासीले ५० हजार रकम घुस लिनेक्रममा आयोगको बुटवलबाट खटिएको टोलीले पक्राउ गरेको हो । पौडेल तथा पासीविरुद्व ५० हजार विगोसहित विशेष अदालत, काठमाडौंमा मुद्दा दायर गरिएको छ ।राजधानी दैनिकमा खबर छ ।

• Categories
• #अपराध
• #अर्थतन्त्र