नेपाल–खनालले के मुद्दा बोकेर एमालेमा रहने निर्णय लिए ?

आगमनखबर संवाददाता

काठमाडौँ । सर्वोच्च अदालतले तत्कालीन एमाले र माओवादी केन्द्रको एकता बदर हुने गरी फैसला दिएसँगै दुवै पार्टी पूर्ववत तहमा अस्तित्वमा आएका छन् । नेकपामा पुष्पकमल दाहालसँग सहकार्य गरेका माधवकुमार नेपाल समूहले अदालतको फैसलासँगै पूर्वएमालेमै रहने निर्णय लिएको छ ।

नेकपामा हुँदा प्रधानमन्त्री केपी शर्मा ओलीसँग कठोर आन्तरिक संघर्ष गरेका नेता नेपाल अब एमालेमा ओलीकै नेतृत्वको कमिटीमा वरिष्ठ नेताका रुपमा रहने छन् । योसँगै उनी एमालेमा राजनीतिक र सांगठनिक रुपमा के मुद्दा उठाउँछन् ? आमचासो बढेको छ ।

नेकपाको दाहाल–नेपाल समूहको स्थायी कमिटीको अन्तिम बैठकमा नेपालले एमालेभित्र आफूले उठाउने मुद्दाबारे जानकारी गराएका छन् । दाहाल–नेपाल समूहको स्थायी कमिटी बैठक अगाडि एमालेको नेपाल समूहको स्थायी कमिटीको पनि बैठक बसेको थियो । सोही बैठकले अदालतको फैसला अनुसार एमालेमै फर्कने निर्णय लिएको थियो ।

त्यसपछि दाहाल–नेपाल समूहको बैठकले एमाले र माओवादी केन्द्र अलग अलग भएर जाने निर्णय गरेको थियो । एमालेमा फर्केपछि नेपाल समूहले राजनीतिक, सांगठनिक र सरकारको विषयमा अहिले उठाइरहेको मुद्दालाई निरन्तरता दिने भएको छ । पेरिसडाँडामा भएको अनौपचारिक बैठकमा नेता नेपालको भनाइ थियो– ‘अदालतको फैसला अनुसार प्राविधिकरुपमा हामी पूर्ववत् पार्टीमा फर्कनुपर्ने भयो । अब एमालेमै बसेर पनि हामीले अहिले उठाइरहेका मुद्दा उठाउँछौँ । -कान्तिपुर दैनिक

• Categories
• #राजनीति