गरे के हुँदैन, हलेसी तुवाचुङ नगरपालिकाले दिएको सिप विकास तालिमले स्थानीय खुशी

यज्ञ कुमार राई

खोटाङ । खोटाङको हलेसी तुवाचुङ नगरपालिका ३ च्यास्मिटारका महिलाहरु मकैको खोसेलाबाट विभिन्न सामग्री बनाउन सक्ने भएका छन् ।

नगरपालिकाले गरिवी निवारणको लागि लघु उद्यम विकास कार्यक्रम अन्तर्गत मकैको खोसेलाको विभिन्न सामग्री निर्माण गर्ने एक महिने सीप विकास तालिम दिएपछि खोसेलाबाट विभिन्न सामग्री बनाउन सक्ने भएका हुन ।

मकैको खोसेलाको विभिन्न सामग्रीको निर्माण गर्ने सीप विकास तालिम पाएपछि पिरा, डोरम्याट, टि म्याट, झोला, चप्पल, फुलदानी, गमला, टोपी, डाइनिङ म्याट र चकटी बनाउन सक्ने भएको हलेसी तुवाचुङ नगरपालिकाका उपप्रमुख बिमला राईले जानकारी दिनुभयो ।

महिलाहरुले तालिम अवधिमा निर्माण गरेको मकैको खोसेलाबाट बनेका १२ हजार ६३० रुपैयाँ बराबरको सामग्रीहरु महिला उद्यमी महासंघ केन्द्रीय अध्यक्ष देविका बुढाथोकीले खरीद गरिदिनु भएको छ ।

अबका दिनमा महिलाहरुले निर्माण गरेको मकैको खोसेलाका सामग्रीहरु विक्रीका लागि वजारीकरणको जिम्मा पनि महिला उद्यमी महासंघ केन्द्रीय अध्यक्ष बुढाथोकीले लिनुभएको उपप्रमुख राईले जानकारी दिनुभयो ।

महिलाहरुले बनाएको सामग्रीको मूल्य पनि निर्धारण गरिएको छ । उनीहरुले मकैको खोसेलाबाट बनाएको सामग्रीहरु चिनसम्म निर्यात हुने वातावरण बनेको छ । एक महिने सीप विकास तालिमको समापनमा वोल्दै सहभागी महिलाहरुले अब मकैको खोसेलाबाट आर्जन गर्ने बताएका छन् ।

३० जना महिलाहरुले तालिममा भाग लिएका थिए भने केही समयपछि धितुङमा पनि मकैको खोसेलाको विभिन्न सामग्री निर्माण गर्ने तालिमको आयोजना गरिने नगरपालिकाले जनाएको छ । माग र इच्छा अनुसार अन्य ठाउँमा पनि तालिम गराउने नगरको लक्ष्य रहेको छ ।

गरिवी निवारणको लागि लघु उद्यम विकास कार्यक्रमका लागि नगरपालिकाले ४२ लाख ६० हजार वजेट विनियोजन गरेको छ । सो वजेटबाट विभिन्न महिला उद्यमी तालिम, कोसेली घर निर्माण लगायतका महिलामैत्री कार्यक्रमहरु गरिने जनाएको छ ।

तालिमको समापनमा बोल्दै नगरप्रमुख इवन राईले तालिममा सहभागीहरु मध्य उत्कृष्ट ५ जनालाई थप तालिमका लागी काठमाडौं पठाउने ब्याबस्था नगरपालिकाले गर्ने र यस तालिमले महिलाहरुलाई आत्मनिर्भर बन्न ठूलो सहयोग गरेको बताउनुभयो ।