नेकपा विवाद : प्रदुषित तालमेल , भेलाको नाममा आरोप प्रत्यारोपको खेल

आगमनखबर संवाददाता

सत्तारुढ दल नेपाल कम्युनिस्ट पार्टी नेकपाका अध्यक्षद्वय केपी शर्मा ओली र पुष्पकमल दाहाल प्रचण्डबीचको आरोप प्रत्यारोप तथा अविश्वास छताछुल्ल भएपछि करिव ३० महिना पुरानो एकताले पूर्ण स्वरुप नपाउँदै सत्ताधारी नेकपा विभाजनको संघारमा उभिन पुग्यो ।

पार्टीभित्र आन्तरिक विवाद बढ्दै गएपछि विभाजनको मुखमा पुगेर छुट्टिएका प्रचण्ड-माधव पक्ष र ओली पक्षबीच राजनीतिक आरोप-प्रत्यारोप दिनादिनुन बढ्दै गएको छ ।

केहि दिनअगाडी सरकारको सिफारिसमा राष्ट्रपतिले गरेको संसद विघटनले नेकपा विवादको खाडल झनै गहिरो बनाउदै गएको छ । प्रधानमन्त्री ओलीले संसद विघटन गरे भन्ने विषयलाई लिएर नेकपाको प्रचण्ड-माधब पक्ष झनझन रुष्ट हुदै गएको छ ।

विभाजित दुई समुहको देशव्यापी भेला द्रुतगतिमा अगाडी बढ्दै गईरहेको छ । आजकल दिनदिनै कुनै न कुनै समुहको भेला भएकै हुन्छ । कहिले पार्टी प्यालेस, कहिले प्रज्ञा प्रतिष्ठान त कहिले नेताहरुको आफ्नै गृहजिल्लाहरुमा भेला हुने क्रम जारि रहेको छ ।

ओली पक्षको भेला हुदा प्रचण्ड- माधव पक्षलाई आरोप लगाउने काम हुन्छ भने प्रचण्ड- माधव पक्षको भेला हुदा ओलीलाई आरोप लगाउने काम हुन्छ । पार्टी एकता हुने बेलामा नङ्ग र मासुजसरि मिलेका यी नेकपाका नेताहरु अहिले विभाजन हुन थालेपछि सोच्ने नसकिने खालका आरोप प्रत्यारोप एक अर्कालाई लगाउदै हिड्न थालेका छन् ।

कहिले ओलीले प्रचन्डलाई पार्टीबाट हटाएको बताउछन लगाउछन त कहिले प्रचण्डले ओलीलाई पार्टीबाट हटाएको बताउछन । यसरि एक समुहले अर्को समुहलाई लगाएको यस्तो आरोप प्रत्यारोपले यिनीहरुको नाजायज हर्कतको भण्डाफोर त हुन्छ नै यसले जनतासामु यिनीहरुको हैसियत पनि घामझैँ छर्लंग बनाईदिन्छ ।

दलका नेताहरुले भेला भनेर निम्त्याएको कार्यक्रममा ९० प्रतिशत भन्दा बढी भाषण अर्को समुहको नेतालाई गालि गर्दै बित्छ, चाहे त्यो भेला ओली पक्षको होस् या प्रचण्ड- माधव पक्षको होस्, उनीहरु एकले अर्कालाई जनताका सामु आरोप लगाउनु भनेको आफ्नो समुहको पब्लिसिटी गर्नु हो । उनीहरुको एउटा मात्र चाहना हुन्छ कि धेरै भन्दा धेरै मानिसहरु आफ्नो समुहमा आउन र आगामी चुनाबमा आफ्नो पार्टी एक नम्बरमा आओस ।

निर्वाचन आयोगको निर्णय आउनुभन्दा अगाडी नै दुवै पक्षले नेकपाको वैधानिकता आफ्नो पक्षमा दावी गरिसकेका हुन्छन । पार्टीको वैधानिकतालाई लिएर एकले अर्कालाई आरोप लगाएको पनि धेरै मात्रामा पाउन सकिन्छ ।

एक पक्षले अर्को पक्षलाई लगाउने यस्ता आरोप तथा आन्दोलनका कार्यक्रमले नेकपामा खतराको घन्टी त नराम्रोसंग बज्छ नै यसले अन्य क्षेत्रहरुमा पनि गहिरो असर पार्दछ । शिर्ष दलका नेताहरुले देशको राजनीतिक अवस्था विचलित हुदै गएपछि अन्य क्षेत्रहरु पनि त्यसबाट प्रभावित हुन्छन भन्ने कुरालाई आफ्नो दिमागमा राखेर सोहीअनुसार आफ्ना विवादित मुद्धाहरुलाई छिटो भन्दा छिटो सुल्झाउन आवश्यक छ ।