कांग्रेस महिला विभागमा ३८ सदस्य मनोनयन (नामावली सहित )

आगमनखबर संवाददाता

कांग्रेस सभापति शेरबहादुर देउवाले पार्टीको महिला विभागमा एक सचिवसहित ३८ सदस्य मनोनयन गरेका छन् । देउवाले यसअघि नै विभागको संयोजकमा केन्द्रीय सदस्य इश्वरी न्यौपानेलाई तोकेका थिए ।

देउवाले सचिवमा पार्टीका वरिष्ठ नेता रामचन्द्र पौडेल पक्षमा रहेकी लक्ष्मी खतिवडालाई मनोनयन गरेका छन् । तर, पौडेल समूहले भने महाधिवेशनको तालिका घोषणा भई प्रकृया अघि बढिसकेको बेलामा विभागमा सदस्यहरु मनोनयन गरेर आचारसंहिता उल्ंघन गरेको भन्दै विरोध गरेको छ ।

असार १ गते पौडेल, महामन्त्री शशांक कोइराला, कोषाध्यक्ष सीतादेवी यादवले संयुक्त विज्ञप्ति निकालेर विरोध गरेका थिए । पार्टी विधानले ६ महिनाभित्रै मात्रै विभाग गठन गर्न पाउने व्यवस्था रहेको समेत उनीहरुलाई सभापति देउवालाई सम्झाएका छन् ।

देउवाको चार वर्षको कार्यकाल फागुनमै सकिएको उल्लेख गर्दै पौडेल पक्षले विभागको संयोजक र सदस्य मनोनयन विधानको व्यवस्थाको विरुद्ध समेत रहेको जनाएको छ । पौडेल पक्षले पार्टीको निर्वाचन समितिलाई यस्ता मनोनयन हुन नदिन र भएका बदर गराउन माग समेत गरेको थियो । तर, देउवाले यसअघि २० वटा विभागको संयोजक तोकिसकेका र ती सबैमा सदस्य मनोनयन गर्ने तयारी समेत अघि बढाइसकेका छन् । केही दिनमै प्रचार विभागको सदस्य मनोनयनको तयारी भइरहेको स्रोतले बतायो ।